Baby Tamaraws kampeon ng UAAP Jrs. Basketball

MANILA, Philippines - Tinalo ng Far Eastern University-Diliman ang defending champions Nazareth School of National University, 81-73 sa Game 2 ng kanilang best-of-three Finals series para kunin ang kampeonato sa juniors division ng UAAP Season 79 men’s basketball tournament sa San Juan Arena kahapon.

Pinarangalan bilang Finals MVP ang pointguard na si LJ Gonzales, na gumawa ng 9.5 puntos, 6.5 rebounds at walong assist sa championship series.

Naglista naman ng double-double na 18 puntos at 15 rebounds si Baby Tamaraws senior Kenji Roman habang nag-ambag naman ng 13 puntos si RJ Abarrientos para pangunahan ang kanilang opensiba.

Matapos malama-ngan ng 26-15 pagkatapos ng first quarter, kumayod ng mabuti ang Baby Tams hanggang sa makalamang sa unang pagkakataon sa laro, 51-50 sa pagtatapos ng third quarter.

Naagaw pa itong muli ng Bullpups na nakapagtala pa ng 61-55, sa ika-6:38 punto ng huling quarter sa tres ni Paul Manalang ngunit pagkatapos noon ay nagpakawala ng 10-2 run ang Baby Tams sa pamumuno ni Gonzales na nag-ambag ng 10 sa kanyang 12 puntos sa nasabing quarter at mula doon ay nahirapan nang makalapit pa ang NU.

Nagbigay rin si Gonzales ng anim na assist para tapusin ang kanyang huling laro sa juniors division.

Ito ang unang kampeonato ng FEU-Diliman mula noong 2012, kung saan tinalo rin nila ang NU, 2-0.

Gumawa naman ng 26 na puntos at anim na rebounds ang senior na si John Lloyd Clemente para sa NU.

Sa iba pang individual awards ngayong season, napanalunan ni UPIS forward Juan Gomez De Liaño ang Most Valuable Player award sa average na 19.1 puntos, 10.3 rebounds, 3.5 assists at 1.5 steals kada laro sa elimination round.  - FML