Irving gusto magpa-trade
CEBU, Philippines - Sa usa ka makapakugang nga kalamboan sa NBA, si Cleveland point guard Kyrie Irving mihangyo sa Cavaliers nga i-trade siya, butang nga nakapakurat mismo sa ilang superstar nga si LeBron James.
Kinutlo ang impormasyon gikan sa pipila ka kasaligang tinubdan, gitaho sa ESPN nga si Irving personal nga misulti ngadto ni team owner Dan Gilbert sa miaging semana nga gusto siyang magpa-’trade’.
Gibalita sab dayon sa Cleveland.com ang tinguha sa 25-anyos nga si Irving nga moeskapo gikan sa anino ni James sa ingon siya na mismo ang motimon ug magdala sa liderato sa usa ka team.
Ang maong balita mibuto pipila ka adlaw human si Irving mihulagway ngadto sa Sports Illustrated nga maora’g nagkaguliyang ang sitwasyon sa Cavaliers human sila napilde sa Golden State Warriors sa miaging NBA Finals niadtong Hunyo.
Ang ahente ni Irving nga si Jeff Wechsler wala hinuon mikompirma sa laraw sa Australyano niyang kliyente nga magpabalhin og laing koponan.
“We met with Cavs’ leadership and we discussed many different scenarios in reference to Kyrie and his future with the team,” matud pa ni Wechsler segun sa taho sa Agence France Presse.
“There were a bunch of scenarios, and I’m not going to discuss anything that was said. I don't know where this is coming from.”
Si Irving nga nahimong No. 1 overall pick niadtong 2011 NBA Draft human makaduwa sa Duke University sulod sa usa tuig, duna pa’y nahibiling tulo ka tuig ug $60 million sa kasamtangan niyang kontrata sa Cavaliers.
Ang four-time All-Star dunay average nga 25.2 points ug 5.8 assists sulod sa 72 ka duwa sa Cavaliers sa miaging season. (BANAT NEWS)
- Latest