760 Pulis bantay sarado sa simbahan
MANILA, Philippines - Bantay sarado sa 760 pulis ng Manila Police District (MPD) na itinalaga sa Oplan Summer Vacation (Sumvac ) ang mga simbahan sa lungsod ng Maynila kaugnay ng pagdaraos ng Semana Santa simula Abril 9 hanggang Linggo ng Pagkabuhay.
Ayon kay MPD Director, P/Chief Supt. Joel Napoleon Coronel ang deployment ng 760 pulis ay bilang tugon sa kautusan ni Manila Mayor Joseph Estrada na maglatag ng security measure para bigyang seguridad ang publiko na inaasahang dadagsa sa mga simbahan sa lungsod.
Kabilang din sa ibibigay na seguridad ang pag-alalay sa kaligtasan ng mga motorista at commuter na magbabakasyon at lalabas ng Maynila.
Sinabi ni Coronel, ang mga nakatalaga sa Oplan Sumvac ay may counter-terrorism mission dahil hindi maaring ipagwalang-bahala ang pagkumpirma ng Philippine National Police (PNP) sa banta na maaring maghasik ng panganib ang terrorist cell ng Maute group na nasa Metro Manila.
Samantalang , bukod sa mga unipormadong pulis, may mga nakasuot din ng sibilyan na ipinakakalat sa mga bus terminals, daungan at sa iba pang matataong lugar.
- Latest
