Bugti sa kalamboan

Hilabihan ka paspas ang pagligid sa panahon nga naghatod na og dako kaayo nga kausaban.

Tulo ka tuig gikan karon dili lang matagdan hingpit nang matukod ang ikatulong taytayan sa lungsod sa Cordova ug dakbayan sa Sugbo.

Gisubhan kini niadtong Huwebes ni Presisente Rodrigo Duterte ug gitambongan sa mga opisyal sa duha ka mga local government units.

Ang Cordova-Cebu Link Expressway anaa mahimutang sa Sitio Dapitan Brgy. Pilipog, Cordova nga molagbas ngadto sa South Road Properties (SRP) sa dakbayan sa Sugbo.

Dul-an sa 28 bilyones pesos ang gastohon sa otso kilometros nga third bridge. Kini ang solusyon sa problema sa trapiko sa duha ka mga taytayan sa Mactan ug Mandaue.

Makamugna kini og dako nga oportunidad sa paglambo ilabi na sa lungsod sa Cordova o sa tibuok isla sa Mactan.

Apan ang bunga sa paglambo maghatod usab og kausaban sa naandan nga kinabuhi ug  panginabuhian sa katawhan.

Usa na niini ang isyu sa mga karsada diin karon pa lang gani huot na man.

Pun-an pa sa mga de pasaherong multicab nga dili gyud mopadaplin kung mopasakay ug mopakanaog og mga pasahero.

Labaw sa tanan ang mga trisikad nga gabahis-bahis sa highway sa lungsod sa Cordova.

Ang nakaparat kay dili gyud intawon mopadaplin o mamidpid man lang ang mga trisikad kay mopatunga gyud hinoon.

Ang resulta mag-aginod gyud ang mga sakyanan nga gasunod kay maglisod man sa pag- overtake kay peligro sa ikasugat nga sakyanan.

Labaw sa tanan gikinananglan ang pagpalapad sa mga karsada.

Ang kalamboan ang bunga sa gipaabot nga kausaban nga karon pa lang dawaton na sa mga tawo nga seguradong maapektohan.