Cholera sa Carnaza nasanta na

CEBU, Philippines - Wala na madugangi ang kaso sa cholera sa Isla sa Barangay Carnaza sa Lungsod sa Daanbantayan sukad nga nideklarar og outbreak ang Department of Health.

Apan sumala pa ni Daanbantayan Mayor Vicente Loot nga dili pa gihapon luwas nga mokuha og tubig sa siyam ka atabay sa isla nga kontaminado sa hugaw.

Si Loot nagkanayon nga ila na hinoon gilimpyohan ug gibutangan og chlorine ang maong mga atabay apan matud niya nga wala pay deklarasyon nga luwas na kining gamiton.

Ang lokal nga kagamhanan sa lungsod nanghatag kini og aqua tabs ug chlorine sa mga panimalay sa isla aron luwas nga magamit ang tubig.

Gawas sa paghatag og water purifier ila na sab giabisohan ang mga residente nga pabukalan ang tubig una pa kini gamiton.

Si Loot nagkanayon nga ang himoon nila karon mao ang pagpahigayon og chlorination matag buwan sa mga tinubdan sa tubig sa isla aron luwas ang mga residente.

Dili mominus sa 100 ka residente ang nagsuka ug kalibang niadtong Pebrero sa isla gumikan sa kontaminado nga tubig ug positibo sa e-coli, usa ka bacteria gikan sa hugaw sa tawo ug hayop.

Unang gideklarar ang diarrhea outbreak sa isla apan nasayran sa DOH nga dili diarrhea kun dili cholera na ang sakit sa mga residente. (BANAT NEWS)