Team Rama batok Edgar ‘N Tony sa 50-Above Finals

CEBU, Philippines - Ang team Rama ug ang Edgar ‘N Tony miagi og managlahing dalan sa wala pa makasulod sa finals sa  first conference sa Power Forty Ballclub 50-Above basketball tournament.

Wala kaayo paningta ang team Rama sa pag-abante sa finals  human ilang gilubong ang team Atillo sa iskor nga 94-52, samtang ang Edgar ‘N Tony  mipakurat sa team Yosores,  71-68 sa semifinals niadtong Martes sa gabii didto sa Inayawan  Sports Complex.

Si Al Misa mipatuasik og 21 puntos, samtang sila si Michael Arias ug None Sabandeja mitusak og 18 puntos matag usa alang sa team Rama nga sayong nanginit aron moposte og 30-14 sa first quarter.

Wala pa makontento,  ang team Rama, kansang kainit daw walay pagkalurang,  padayong mirumbo sa nagkagidlay nga team Atillo sa wala pa moposte og 42 puntos nga demolisyon.

Si Celso Cabaluna miamot og 14 puntos, samtang si Alex Balansag  mitampo’g 13 puntos sa team  Rama ni Romy Rama nga nakapanemaho na sa ilang sayong kadaugan human moposte og 77-44 nga bentaha paingon sa final period.

Sila si Jun Abapo ug Teody Ebrado nagkumboya’g 26 puntos aron mangulo sa natagak nga team Atillo ni Sammy Atillo.

Sa  laing bahin, si Rone Carbonilla mikadlit og 24 puntos sa Edgar ‘N Tony nga miagi una og kalisud una nila makuha ang lingkoranan sa finals.

Sila si Eric Chiong ug Ricky Dayondon mitampo’g 14 ug 13 puntos sa Edgar ‘N Tony.

Ligas kaayo ang  duwa ug nabiyaan pa gani ang Edgar ‘N Tony sa halftime, 33-34. Didto na makabuylo ang Edgar ‘N Tony sa final period  hinungdan nga ila gyud nga napukan ang team Yosores.

Ang playing team manager nga si Atty. Flor Yosores mao mismo ang nangunay sa pagpangulo sa iyang koponang team Yosores nga mikamada og 16 puntos, gisundan ni Roel Traya nga adunay 14 puntos ug Jun Nacional sa iyang 12 puntos.

Ang liga nahimo pinaagi sa mga paningkamot nilang Dome Labalan, Vez Eleguin ug commissioner Edwin Dejacto Sr.

Puntos matag usa

Unang duwa:

EDGAR & TONY (71) – Carbonilla 24, Chiong 14, Dayondon 13, Flordiliza 8, Sandal 8, Villaner 4.

YOSORES (68) – F. Yosores 16, Traya 14, Nacional 12, S. Yosores 9, Moniva 9, Pestaño 8.

Ikaduhang duwa:

RAMA (94) – Misa 21, Arias 18, Sabandeja 18, Cabaluna 14, Balansag 13, Mosqueda 4, R. Rama 4, Lisondra 2.

ATILLO (52) – Abapo 14, Ebrado 12, Pabillon 9, Cantarona 6, Atillo 4, Ungria 3, Fuentes 2, Pestaño 2. (BANAT NEWS)