Paryente ni Sabalones sikop

CEBU, Philippines - Paryente sa gipasanginlang drug lord ang nasikop sa kapulisan sa Dakbayan sa Talisay sa buy-bust operation diha sa Sitio Sangi 2, Brgy. Tabunok niadtong Huwebes sa gabii.

Si Supt. Aileen Recla, pangu sa kapulisan sa maong siyudad miila sa dinakpan nga si Memar Sabalones Sabarita, 34.

Gawas pa niya, laing gisikop mao ang iyang kauban nga giingong usa ka “coast guard” personnel nga si Cristitoto Inot, 40, taga Sitio Cabangcalan, Bulacao, Siyudad sa Sugbu ug Fretchie Sabarita, 32.

Nagkanayon si Recla nga aduna pa’y usa ka babaye nga suspek nga nakasibat atol sa operasyon.

Matud pa ni Recla nga si Sabarita ang paryente ni Franz Sabalones ug nalakip na kini sa ilang listahan sa dagkong tawo nga namaligya og ilegal nga drugas. Sa dihang nikagat sa ilang operasyon ang suspek   ila dayun kining gipangsikop. Nakuhaan si Sabarita og 10 ka gagmay nga pakete sa shabu samtang lima ka gagmay nga pakete sa shabu gikan ni Inot ug unom ka gagmay nga pakete gikan ni Fretchie.

Ang ebidensiyang nakuha mitimbang og .66 gramos nga adunay kantidad nga P7,780. Ang mga dinakpan gibalhug sa bilangguan ug gipasakaan og kaso.

Samtang anak sa retiradong polis ug ang kapuyo niini ang nasikop  diha sa Sitio Kilawan, Brgy. Tanke nga giilang si Jack Labita, 28, ug si Zardyleen Abaquita, 19. Si  Labita matud pang Recla apil sa listahan sa ilang buhatan sa mga tawong namaligya og drugas.

Nakuhaan si Labita og 70 ka gagmay nga pakete sa shabu samtang 49 gikan sa iyang kapuyo nga si Abaquita nga nagkantidad tanan og P49,500. Gawas pa sa shabu nakuhaan sab si Labita og .380 pistola nga adunay pito ka bala.

Samtang mokabat sa 23 ka mga tawo ug duha ka drug dens ang nasikop ug gironda sa hiniusang puwersa sa mga sakop sa Philippine Drug Enforcement Agency 7, Regional Anti-illegal Drugs Special Task Group 7 ug Regional Special Operations Group diha sa Sitio Ratan, Brgy. Tangke, Dakbayan sa Talisay. Matud pa ni Leia Albiar, ang tigpamaba sa PDEA-7, duha ka semana sila nagpahigayon og surveillance sa maong lugar human sila nakadawat og impormasyon bahin sa padayong pagpamaligya og ilegal nga drugas sa maong dapit. 

Sumala pa ni Albiar, gimentinar nila ni Richard Macuto, 35,  ug Bernilito Padillo, 25, ang mga drug dens nga ilang gironda.

Dugang pa ni Albiar, walo ka tawo ang nasikop gikan sa drug den ni Macuto ug trese usab ka tawo diha sa balwarte ni Padillo. Samtang 34 ka putos sa gituohang shabu nga mokabat og 100 gramos nga mobalor og P360 mil ug mga kagamitan sa pagsuyop ug pag-repack sa drugas ang nasakmit sa kapolisan. Gabriel Bonjoc ug Rowena D. Capistrano (BANAT NEWS)