Pagtaas sa presyo ng gasolina, umariba

MANILA, Philippines - Muli na namang nagpatupad ng pagtataas sa presyo ng gasolina at iba pang produktong petrolyo ang mga kompanya ng langis sa kabila ng pagbaba ng halaga nito sa internasyunal na merkado.           

Dakong alas-12:01 ng madaling-araw nang pangunahan ng Pilipinas Shell ang P1 kada litro sa diesel at kerosene habang P.50 naman ang itinaas kada litro ng premium at unleaded na gasoline at P.75 naman sa regular gasoline.

Sumunod dito dakong alas-6 ng umaga ang Chevron Philippines at Seaoil ng kahalintulad rin na mga halaga sa naturang mga produkto.

Dahil sa pagtataas, natabunan nito ang kakatiting na P.25 kada litro na rollback na ipinatupad ng mga kompanya ng langis nitong nakaraang linggo.           

Ikinatwiran ng mga kumpanya ng langis na nagbunsod ang price hike sa pag­tataas ng presyo ng langis sa internasyunal na merkado.

Ngunit sa mga internasyunal na ulat kahapon, lumalabas na bumaba pa ang halaga ng langis.

Sa naturang ulat, bumaba ng $.24 sentimos ang kada bariles ng “light sweet crude” na idi-deliber para sa Setyembre habang bumaba rin ng $.11 sentimos ang Brent North sea crude.