EDITORYAL - Signal jammer

Gisugyot ni Mayor Tomas Osmeña nga mogamit og signal jammer ang kapolisan atol sa solemn procession ni Señor Sto. Niño ug sa Sinulog Grand Parade karong Enero 14 sa hapon ug sa tibuok adlaw sa Enero 15.

Tumong sa mayor nga dili makapamomba ang mga terorista nga makaangin unya og daghang kinabuhi sa mga motambong sa solemn procession ug grand parade.

Ang mga terorista sagad mogamit og cellphone sa pagpaulbo sa eksplosibo nga ilang gamiton sa paggubot sa usa ka lugar. Kun gamitan og signal jammer, ang tanang cellphones sa maong dapit, dili na maka-send og signal ang mga cellphones.

Si Osmeña misugyot na niini ngadto kang PNP Chief Ronald Dela Roza, apan wa panumbalinga ang iyang rekomendasyon. Ang signal sa mga cellphones nagagikan sa lainlaing cell sites dinhi sa dakbayan.

Kun nameligro man gyud ang kinabuhi sa katawhan nga mosaksi sa Sinulog Grand Parade ug angay sila nga protehean sa posibleng pagpangatake sa mga terorista, nganong dili man makigtagbo ang mayor uban sa kadagkoan sa kapolisan sa mga tagdumala sa mga cellphone networks.

Mas sayon pa himoon ang pagpawong sa mga cell sites sa mga cellphone networks diha sa Parade Route aron wala nay signal nga mosulod sa mga cellphones. Apan angay’ng balansehon gyud pag-ayo kun mas daghan ba ang kaayuhan pinaagi sa pagpawong sa mga cell sites.

Kun pagngon sa mga telecommunications companies ang ilang cell sites, kaliboan ka katawhan nga anaa sa parade route ang dili na makakontak sa ilang mga sakop sa pamilya ug kahigalaan.

Kun mogamit og mga signal jammers ang kagamhanan, mahimong ang mga terorista mangita ra og dapit sa parade route nga may signal ug adto sila magmugna og kagubot. Mas bentaha gyud nga kitang tanan magbantay nga dili kita masudlan og mga tawo nga ang tuyo mao lang ang paggubot sa atong kalihukan.

Mag-ampo kita kang Senyor Santo Niño.