“No ID No Entry’ na sa south terminal

CEBU, Philippines - Sugod kagahapon gipatuman na sa Cebu South Bus Terminal ang “No ID No Entry” nga polisiya alang sa mga drayber, konduktor, dispatchers ug ingon man mga ambulant vendors.

Matud ni Joey Herrera, pangulo sa CSBT, nga tuyo niini mao ang seguridad sa terminal aron mailhan kung kinsa lang ang mosulod ug mogawas gawas lang sa mga pasahero.

Aduna nay mga ID nga gipanghatag sa mga dispatchers sa terminal apan ang uban dili mosul-ob hinungdan nga mas istrikto ang ilang pagpatuman niini karon.

“Kun pananglitan man gani wala jud silay ID, then they have to stay inside the bus, dili sila pwede nga maglaroy-laroy lang diha (sa terminal),” matud ni Herrera.

Dugang niya nga kadtong mga drayber ug konduktor kinahanglan usab kini magsul-ob  sa ilang uniporme sa kompaniya sa bus.

Matud niya nga sukad sa niaging semana ilang gipahibawo ang mga kawani sa terminal lakip na ang mga bus operators sa bag-ong polisiya.

Ang lakang gipatuman human  sa pipila ka hitabo sa pagpangawat sa terminal diin mismo ang guwardiya pa ang gikawatan sa iyang bag sa guard house.

“Security measures kay para lang mi makaila sa mga tawo diha sa terminal,” dugang ni Herrera. (BANAT NEWS)