Bandera sa walog

Alas tres sa hapon way uwan, hayag ang kalangitan. Nagbarog si Bobby sa karsada atbang sa saring publiko sa Danao.

Nagsige siya'g teleskopyo ngadto sa bukid---ang gitumong sa iyang pagteleskopyo ang walog tungatunga sa duha ka bungtod.

May nagwarawara og banderang pula sa walog sa duha ka bungtod. Ang maong dapit may gilay-ong bayente kilometros kapin kun kulang gikan sa gibarogan ni Bobby. Daghang mga nahibulong nga tawo nga nakakita sa gibuhat ni Bobby.

Gipindot niya ang selpon. "Bay Ernie, nakita na nako imong bandera," ni Bobby. Puwede na ko mamatay kay nakaabot na ko dinhi sa pikas linya. Nakugang si Bobby sa iyang nadungog.

Suod nga managhigala sila's Bobby ug Ernie, mga magtutudlo sila sa saring publiko sa Carmen ug nagpuyo sab sa maong lungsod. Mga ulitawo pa sila unya sa higayon nga manuroy sila sa siyudad sa Sugbo magsakay og mini-bus, kanunay gyud si Ernie nga molantaw sa bukid ug sige niyang gitudlo ang dapit sa bukid sa Danao nga gusto niyang tungason.

"Nganong niingon ka mang puwede na kang mamatay? May sakit ka o naglaraw kang maghikog?" ni Bobby. Hugot ang paggunit sa selpon gipiog sa walang dunggan. Nabalaka siya sa higala wa na siya nagteleskopyo kay hanap ang bandera tungod sa kalayo. "Tungod sa ka nindot sa talan-awon diri sa akong gibarogan ug sa palibot nga wa gyud nako nakita sukad sa akong pagkatawo, kontento na ko sa kinabuhi," ni Ernie. Saya ang tunada ug niteks kang Bobby.

"Sa kasadpan makita nako ang isla sa Negros ug Tanon Strait.Sa silangan makita nako ang isla sa Bohol ug Bohol Strait. Kun gusto tang motan-aw og mga nindot nga talan-awon, di na ta kinahanglang mo-abroad pa o moadto sa ubang mga isla sa Pilipinas. Sa Sugbo lang daan tagbaw ka na," nabasa ni Bobby sa iyang selpon.

Gibati hinuon og kasina si Bobby sa higala, nakahukom siyang motungas sab sa giadtoan ni Ernie ug magpakuyog siya's higala makigtakda siya'g laing adlaw. (Kataposan)