Hain ang inyong pagsabot - Gula 115

Akoy moabaga sa tanan," matud pa sa lalaki.

"Dili Andy may kusog pa ko nga maningkamot para sa kaugalingon kong pamilya nag-eskwela ka pa sab," matud pa ni Erica, "please ayaw balibari ang...." wa matiwas ang gisulti.

"Please tahura ang akong desisyon isaad ko kanimo nga sama sa gihapon dili ko manawat og customers pagsayaw lang gihapon ang bugtong kong buhaton sa club," matud pa sa dalaaga. Way nahimo ang lalaki tungod sa dakong gugma niini gipaboran ang gusto sa babaye.

Tuod man mibalik sa pagtrabaho si Erica, kada gabii kuhaon siya ni Andy ug ihatud sa ilang panimalay padayon gihapon ang dili maayong pagtagad kaniya sa iyang mga igsuon gawas kang Otoy.  Usa ka adlaw niana samtang busy si Erica nga nangandam alang sa iyang pag-eskwela ug pagtrabaho human sa klase miabot gikan sa eskwelahan si Lenny.

"Lenny day may giluto kong pagkaon diha nahibawo kong gigutom ka kaon na," ni Erica pa ngadto sa manghud. Bisan og dili siya tagdon apan padayon siyang mitingog sa igsuon nangusmo lang si Lenny, gibutang ang bag sa lingkuranan sa kataposan mitingog si Lenny.

"Busy?" sarkastiko nga pulong ni Lenny igo lang gilingi ni Erica ang manghud sa kahiladman sa iyang kasing-kasing, may kalipay nga gibati ang dalaga tago nga mipahiyom kay sa kataposan mitingog kaniya ang manghod, apan ang pagtingog ni Lenny kaniya wala nagpasabot nga naulian na kini gikan sa dili maayong tratamento kaniya sa manghud.

"Busy ang igsuon kong puta," matud pa ni Lenny nakalitan si Erica sukwahi sa iyang gituhoan kay nagtuo siya nga magkauli na ang maayo nilang kabubut-on.

"Lenny...day," bugtong pulong ni Erica.

"Hangtod sa hangtod kong masilag nimo tungod sa imong binuhatan," matud pa ni Lenny. "Kanus-a man mo makasabot? Hain ang inyong pagsabot?Gibuhat ko kini tungod ug alang kaninyo," matud pa ni Erica nga andam nang mubuhagay ang mga luha.

"Ayaw mi himuang rason aron mamurikat ka gikapoy na ko sa mga pagbiay-biay sa mga silingan nato nga may maguwang kong puta!! Nabungol na ko sa mga libak sa mga silingan gikapoy na ko tungod sa imong pagka-prostitute! Ni Lenny pa nga may luha na ang mga mata hinay nga giliso ni Erica ang lawas paatubang kang Lenny. "Ngano Lenny? Ikaw lang ba ang gikapoy? Ikaw lang ang makadungog og pagbiay-biay sa atong mga silingan? Dili kana ba lang manumbaling nako nga ako mismo ang gisumsoman nila sa ilang libak?" matud pa ni Erica nga hinay ang pagkasulti kalmado apan inanay nga miagas ang mga luha sa iyang mga mata.

"Bisan napuno na ta sa libak pero padayon gihapon kang nagpakauwaw padayon kang namurikat!!" ni Lenny nga mitaas ang tingog nga naghilak.

"Kinsa bang babayhana ang gustong maghugaw-hugaw sa iyang pagkatawo? Kinsa bang babayhana ang gustong mopadayon niining matanga sa trabaho? Pero wa koy laing kapaingnan aron mabuhi ta gibuhat ko kini para ninyo!" miisa na sab ang tingog ni Erica.

"Dili para namo kun dili para sa imong kaugalingon ug sa imong kauwagan!!" matud pa ni Lenny nga gidudo ang nawong sa nawong ni Erica wala makapugong sa gibati ang dalaga daling nakabakyaw sa iyang kamot.

Paaakkk! Mipiti ang aping ni Lenny nga naigo sa tamparos ni Erica nagpanghikap sa aping si Lenny nga gisakitan.

"Animal ka! Halimparot ka! Burikat ka!! Salawayon, way uwaw, baga kag nawong!!" ni Lenny nga halos ipagawas ang tanang tingog. "Oo burikat ko nagpakauwaw ko baga ko'g nawong!! Apan sa akong pagpabaga sa nawong ug pagpakaulaw may tawo kong gisalbar gikan sa ilang kagutom!!!" ni Erica nga miisa na sab ang tingog.

Pakkkk!!! Pagpiti sa aping ni Erica nga gisagpa ni Lenny. (Sumpayan)