Gugma sa duha ka binuhat - Gula 109

Sa nabati sa lalaki mura'g siya na ang labing malipayong binuhat niadtong tungora.

"Ti..tinuod ka? Nahigugma ka sab nako Erica?" matud pa sa lalaki nga ingon og dili gihapon makatoo. Igo lang sa pagtando si Erica nga mipahiyom apan may luha pa gihapon ang iyang mga mata. "Kun mao salamat. Salamat Erica isaad ko nimo dili tika pasakitan. Isaad ko nimo nga permi kong naa sa imong kiliran sa kalipay man o kasakit unongan tika," matud pa sa lalaki.

"Salamat kaayo Andy sige na manganaug na ta gusto na kong muhigda, gusto kong madapat sa higdanan ang akong lawas," matud pa sa babaye. Tuod man daling migawas gikan sa awto ang lalaki ug giablihan niya si Erica aron manaug sa sakyanan. Milahos sila sa kuwarto sa beach house sa pagsulod pa lang ni Erica sa maong kuwarto  nahingangha siya kay pwerti man kining dakua. Ka-upat pil-on sa ilang balay ang gidak-on sa maong kuwarto. May kumpleto sa gamit ug may couch pa may kaugalingon usab kining veranda nga nag-umbaw sa dagat. Human gitagbaw ni Erica ang mga mata sa palibot sa maong lawak mihigda kini sa humok kaayo nga kama. Gihiram niya sa duha ka palad ang kahumok sa kutson. Sukad karon pa siya makahigda og ingon niini ka anindot nga higdaanan.

"Ganahan kang maligo? May senina man diha mga bag-o na mga gamit na ni mama nga wala pa niya masul-ob. Hilig og shopping si mama. Sa balay gani mura na'g department store ang kuwarto nilang papa tungod sa kadaghan sa gamit ni mama. Mao nga ang uban iyang gidala dinhi aron kun ganahan siya nga ari magpalabay sa panahon ilabi’g mag-away sila si papa may magamit siya. Masakto ra siguro nimo ang ubang gamit ni mama. May blouse ug pangkatulog diha sa closet. Kuhaan tika samtang maligo ka sa banyo," matud pa ni Andy. Giingnan usab niya ang babaye nga may tualya nang nakaandam sa sulod sa banyo. Misulod ang babaye sa bathroom. Nasiga ang iyang mga mata kay ang maong kaligoanan adunay television, pwerti pang dakua sa maong banyo ingon og gidak-on sa ilang kuwarto sa balay. Unya human makaligo si Erica, gitapis niya ang beach towel. Migawas sa kuwarto ug gikuha ang senina nga pangkatulog nga giandam ni Andy. Wala si Andy pagawas niya sa banyo may gikuha ang lalaki dihang nakailis na siya mao say pagsulod ni Andy nga may dalang basong gatas. "Hot milk Erica inom ini una ka matulog gikinahanglan mo kini," ni Andy  nga midunol sa usa ka basong hot milk giinom kini ni Erica.

"Diha ka sa kama samtang ako ari lang ko sa may couch," ni Andy pa nga mihigda sa couch. Sa tan-aw ni Erica presko na ang lalaki ug nakailis na sab og pajama, busa nangutana siya kun naligo ba sab kini. Mitubag usab ang lalaki nga naligo siya sa pikas kuwarto samtang naligo ang babaye sa banyo. Miyango-yango lang ang babaye. Unya mihigda sa humok kaayong kutson. Gipanugnaw ang dalaga tungod sa kabugnaw sa aircon busa miduol kaniya si Andy ug giwalis ang comforter nga gihigdaan sa dalaga gihabol kini ngadto kang Erica.  "Habol diay ni? Kabaga ba ini?" ni Erica pa nga inosente sa mga butang sa mga adunahan.

"Comforter ni mao ni ihabol aron dili ka tugnawon," ni Andy pa nga mihabol sa dalaga mitutok si Andy kang Erica.

"Andy, " bugtong pulong sa dalaga.

"I love you so much, Erica ikaw na unta ang kataposan dili na ko gustong mangita'g lain pa," ni Andy dayong halok sa aping sa dalaga. Wa moalma ang babaye. Ang paghalok sa aping gisundan kini sa laing paghalok hangtod miabot kini ngadto sa ngabil sa babaye. Wala makasabot si Erica kay unang higayon nga gihagkan siya'g lalaki sa ngabil lalaking iya usab nga gihigugma midugang sa pag-ingon ang lalaki nga hagawhaw ang tingog, "dili mo pagamahayan ang paghigugma mo usab nako Erica. Niining tungora isaad ko nga bisan na lang og singhag dili mo matilawan nako. Higugmaon tika sama sa paghigugma ko sa akong kaugalingon." Ug mihalok na usab ang lalaki sa mainiton gayud diha sa humok nga ngabil sa babaye mibawos usab sa paghalok si Erica kang Andy. (Sumpayan)