Akusasyon

Gula  14

Daling misugat si Mylene sa anak ug migakos.

"Salamat anak kay wala kaayo ka maunsa sa imong pagkadisgrasya Unsa bay nahitabo nimo nga nabangga ka didto sa may Mango Avenue?" pangutana sa inahan nga anaa pa gihapon ang kahingawa sa anak.

"Way laing mabasol sa nahitabo nako ma si Diane ug si daddy," matud pa ni Kyle nga naminti pa gihapon sa kasuko diin hait kaayo'g tinan-awan sa amahan.

"Unsa gud ang gipanulti mo, Kyle? Nganong si daddy man nimo ug Diane ang imong gipasanginlan?" pagkahibulong sa inahan samtang si Ferdie nga naa sa luyo ni Mylene, nangunot ang agtang wala makasabot kun nganong usa na man hinuon siya nga maoy hinungdan sa pagkadisgrasya sa anak. "Unsa may akong kalabotan sa nahitabo ha Kyle? Ako ba gud ang nag- drive? Ako ba gud ang nagdanghag? Swerte ka pa kay wala ka maintimano," matud pa sa amahan nga miatubang sa anak.

"Maayo pa lang unta to nga naintimano ko aron matibway ang tanan," matud pa ni Kyle nga ingon sa nawad-an na'g gana sa pagpakabuhi.

"Anak ayaw pagsulti'g sama niana angay kang magpasalamat sa Ginoo kay wala kaayo'y kadaut dihang nadisgrasya ka," matud pa ni Mylene nga migunit sa bukton sa anak.

"Ikaw ang hinungdan daddy kun dili pa tungod nimo, kun dili pa tungod sa imong pagpanghilabot sa akong kasing-kasing dili unta ko madisgrasya. Tungod sa akong kapungot ug panganti nga makatilaw sa akong kamot si Diane, kun dili pa tungod sa kalibog sa akong hunahuna samtang nag-drive dili unta ko madisgrasya. Tungod nimo daddy tungod nimo kining tanan labaw sa tanan tungod nimo gibiyaan ko sa babaye nga akong gihigugma!!" Pag-isa sa tingog ni Kyle luhaan samtang isog kaayo nga namulong ngadto sa amahan. "Unsa?" bugtong pulong ni Ferdie.

"Dili ba ikaw ang nagmando kang Pia nga buwagan ko? Daghan ka'g kontak daddy makaya nimo ang tanan kay ma-inpluwensiya ka nga tawo. Daghan ka'g kaila labaw sa tanan, daghan ka'g sapi aron mabuhat mo ang gusto mong buhaton. Nganong nangitribir ka man daddy? Dili sala ang higugmaon si Pia, gumikan ba kay usa siya ka commercial sex worker? Gumikan ba sa iyang trabaho? Gihugawan ka niya? Ngano? Unsa  na ba lang gyud diay ka kalimpiyo nga pagkatawo daddy aron ingnon mo kami niini si Pia? Gibuwagan ko sa babayeng akong gihigugma. Maayo pa lang unta to nga namatay ko aron matapos na ang tanan!!" ni Kyle pa nga pwerti nang tyabaw walay hunong ang pag-agas sa iyang mga luha samtang nagtulisok sa iyang amahan.

"Giunsa mo man pagkasayod nga si daddy mo maoy responsable sa tanan? Nga maoy hinungdan nga gibuwagan ka ni Pia?" matud pa sa inahan nga nanglugmaw na ang mga luha nakita ang anak nga midangoy-ngoy. Inahan si Mylene nga naglantaw sa anak nga ingon og gibati usab niya ang gibati sa anak nga gisakitan og maayo sa dughan.

"Dili ba daddy,, gibayran mo'g dakong salapi si Pia aron buwagan ko? O kaha may gisugo kang tawo nga kontakon si Pia, gipakigsultihan, o kaha gihulga si Pia nga kun dili ko niya buwagan dunay dautang mahitabo niya? Dili ba daddy?!! Dili ba?!!" ni Kyle pa nga isog na kaayo.

"Ayaw ko'g tas-i sa imong tingog amahan ko nimo!" pagtaas pud sa tingog ni Ferdie.

"Oo amahan ka pero amahan nga dili manumbaling kun unsay makalipay sa anak. Maniubra nimo ang tanan," tubag sab ni Kyle nga ingon og mokayo na gumikan sa kalagot samtang padayon ang iyang pagluha. "Wa kay igong ebidensiya nga gimaniobra ko ang tanan. Oo!! Tinuod nga supak ko sa inyong relasyon kay dili mahimong isagol ang lapok sa bulawan maghatag lang siya'g kaulawan sa atong pamilya. Ayaw ko'g akusari sa butang nga wala ko mabuhat Kyle. Usa pa wala ka namo padak-a aron motubag-tubag nako'g sama niana. Wala ka namo gipakatawo aron yanu-yanohon lang ko nimo sa pagsinghag labaw sa tanan, mangakusar ka sa butang nga wala ko mabuhat. Kun ingon na man lang ka ana ngari nako nga imong amahan mas maayo pag nadayonan ka ug namatay!" ni Ferdie pa nga nakapakurat kang Mylene. (Sumpayan)