Sulagma

Gula 2

Giabagan ni Rex ang iyang katagi-Borbon sa pagpa-admit sa iyang inahan sa Vicente Sotto Memorial Medical Center. Nasuheto na si Rex sa pamaagi unsaon pagpa-admit og pasyente sa ospital kay siya ang nangunay pag-asikaso diha nga gipa-admit usab niya ang iyang mama.

“Salamat kaayo sa imong pagtabang ha? Nakapahuway na g’yud tawon si mama human mahatagi og injection ug gitauran og dextrose,”  matud sa babaye ngadto kang Rex.  “Marian diay ang akong ngalan,” paila sa babaye ngadto kang Rex samtang nagpahiyom.

Gitunol ni Rex ang iyang tuo nga kamot ngadto kang Marian dungan sa pagtug-an sa iyang ngalan. “Tana Mar, magdungan ta og paniudto kay nasayod ko nga gigutom ka na. Biyai lang kadiyot ang imong mama kay nakapahuway na bitaw na,” ni Rex.

Nagkuyog sila paingon sa kan-anan atbang sa ospital. “Maayo ra g’yud nga mibalik ko pagkakita nga gikan sa Borbon ang pasyente nga gihatod sa ambulansya kay nakatabang ko nimo Mar. Paingon na man unta ko nga mag-lunch ganina,” giingnan ni Rex si Marian.

Human nila’g kaon, nakabantay si Rex nga naghinuktok si Marian ug kanunay lang nagpanglantaw sa ganghaan sa ospital. “Kadugay ni tiyo Ramon uy, basin og magkinahanglan na ang doktor og tambal para ni mama,” ni Marian.

Nasayran ni Rex nga nangita pa’g kuwarta ang uyoan ni Marian aron magamit sa pagpatambal sa iyang manghod nga babaye nga maoy inahan sa dalaga. Namalik sila sa ospital apan giagi usab nila ni Rex ang ward sa iyang inahan.

“Kinsa man kini’ng imong kauban Rex?” matud sa maluyahon pa nga inahan sa ulitawo. Iyang gitug-anan nga si Marian taga lungsod sa Borbon ra ‘sab, silingan ra nila nga barangay sa Sagay.

Miadto sila sa ward sa inahan ni Marian ug naabtan nila ang doktor nga naghiling sa pasyente. Miresita kini’g tambal human nga giingnan ang dalaga nga angay’ng operahan dayon ang iyang inahan kay kuyaw nga makabuto ang apendisaytis. (Sumpayan)