Ang playboy - Gula 7

Mitindog dayon si Caloy human niya kabayri ang duha ka botelya nga beer nga iyang giorder. Mipasumangil si Caloy pag-adto sa pansayan apan ang iyang tuyo mao nga itayming niya ang iyang paggawas nga dili magtan-aw kaniya ang tawo nga namugos ni Lowela sa pakigdeyt.

Wala g’yud tuod makabantay ang tawo nga hilom na nga migawas si Caloy sa Wild Orchids Bar. Sa gawas, gikontrata daan ni Caloy ang taxi driver nga nagparking atubangan sa bar. “Paandara lang daan ang imong taxi bai,” giingnan niya ang drayber.

Nagbarog si Caloy kilid sa taxi. Taud-taud, nakita niya nga paspas nga migawas si Lowela gikan sa bar nga nagkabiba sa iyang bag. “Wel, dia ra ko,” gisinyasan ni Caloy ang amiga niya’ng dancer. Nagpanglingi si Lowela.

“Sakay na, Wel,” matud ni Caloy. “Magdali ta kay mora’g mosunod kadto si Alfred,” ni Lowela pa nga miabli sa pultahan. Nakita ni Caloy nga nagdagan si Alfred paingon sa gawas ug nakit-an niini si Lowela nga misakay sa taxi.

“Daisy, ayaw pagsibat!” singgit ni Alfred kang Lowela, kinsa naila lang niya sa iyang angga sa bar.

Maabtan na g’yud si Caloy ni Alfred nga dili pa makasakay sa taxi. Isog kaayo’g dagway si Alfred nga nakakita nga may kaubang lalaki ang naibgan niya nga dancer.

Walay nahimo si Caloy gawas sa pagsugat og kumo sa nawong ni Alfred. Maayo’ng pagkatikang-kang ni Alfred sa karsada. Nawalis ang polo shirt ni Alfred ug nakita nga may dala diay siya’ng armas.

Abtik nga gitamakan ni Caloy ang tiyan ni Alfred ug gikuha ang armas. Giusban niya’g patid ang kilid ni Alfred diha nga miaksyon pa kini sa pagbangon. Naligid pagbalik si Alfred sa karsada.

Misirit dayon ang drayber diha nga nakasakay na si Caloy. “Wala ka maunsa?” paraygon kaayo si Lowela kang Caloy. “Diritso lang sa Q4 motel bai,” giingnan ni Caloy ang drayber. (Kataposan)