Kanunay kasab-an

Dear Tita Salie,

Good morning. Magpatambag lang unta ko sa akong problema  mahitungod kini sa akong mother nga dili nako masabtan.

Ako diay si Julia, dalaga , duna ko’y igsuon usa kay  duha ra man mi. Ug nasayod ko nga ang akong igsuon nagproblema usab sama sa akong problema.

Dili man gud nako masabtan ang akong inahan tungod kay permi lang siyang masuko ug kanunay lang mi niyang   kasab-an. Tanan niyang isulti ug isugo namo amo gyud kining gisunod apan mao lang gihapon iya lang gihapon ming kasab-an.

Mora man hinuon mi ani og mga wala gyu’y silbi nga mga anak kay kanunay ra man siyang magyawyaw bisan kon walay igong hinungdan.

Usahay makahunahuna ko’g layas sa among balay apan wala man koy kapaingnan. Unsaon man nako kini, Tita Salie? Palihog pasabta ko sa maayo kong buhaton. Daghang salamat sa imong pagtagad. God bless.

* * *

Hello, Julia!

Sa batasan sa imong inahan, wala tay laing mahimo kondili ang pagpailob lamang. Tungod kay bisan balihon nato ang kalibotan siya ra gyud ang imong inahan ug dili na puyde ilisan.

Adunay daghang hinungdan kon nganong ingon niini ang inyong inahan. Imong tan-awon kon unsay iyang kinabuhi diha sa inyong panimalay. Julia, ang tawong malipayon kanunay dili gyud kini mahitabo nga magsigeg kasuko. Kon malipayon siya sa iyang pagka inahan ug pagka asawa I am sure malipayon gyud siyang makig-uban kaninyo. Apan kon problemado siya ug bisi kaayo siya nga wala nay panahon aron mokatawa mao gyud kini ang hinungdan kon nganong kanunay lang siyang gisapot.

Lambinga ang inyong inahan ug papahuwaya usa siya sa iyang trabaho. Isuroy kadiyot sa gawas o sa simbahan. Hatagi siya og break aron siya maka-relax. Hiloton nimo ang iyang lawas kay tingali kon kapoy na siya. - Tita Salie