Kahoy’ng Acacia

Gula 6

Human makaambak si Ben sa dagat, milangoy si Zeny paingon sa tiilan sa dakong bato nga ilang giluksohan. Pagtunga ni Ben gikan sa tubig mipaduol siya sa nahimutangan sa dalaga.

Diha’ng naduol na si Ben sa dalaga, nakita niya nga nagtindog si Zeny sa bato nga nagtuybo sa ilawom sa tubig aron dili siya motidlom. Gitamak ‘sab ni Ben ang iyang tiil ngadto sa bato ilawom sa tubig. Diha-diha, mikabyon si Zeny sa bukton ni Ben. Gihapak sila og bawod nga maoy hinungdan nga nabanda ang lawas ni Zeny sa lawas ni Ben. Ingon sa kalit lang nakoryentehan ang ulitawo. Nanginit ang iyang kalawasan.

“Sori Ben ha, kabuang g’yud ning bawod uy, nakasala hinuon ko,” matud ni Zeny nga nagpahiyom. Abtik kaayo nga nakasagbat si Ben. “Walay problema Zen, gusto pa gani ko nga adunay magsunod-sunod nga bawod aron kanunay ka nga madikit nako.”

Nagkataw-anay sila’ng duha. Mikawas sila sa tubig kay nadungog nila ang tawag sa inahan ni Zeny. “Mangaon usa ta ninyo Zeny, Ben. Abi ba nako og hain na mong duha,” matud sa mama ni Zeny. Human og kaon, namalik sila sa dagat. Kun kapuyon na sa paglangoy-langoy, adto gayud sila si Ben ug Zeny mopahuway sa kilid sa dakong bato. Dili moduol ang mga igsuon ni Zeny kay lawom man sa maong dapit.

“Wala ka pa diay boyfriend Zen?” wala g’yud makaantos si Ben. “Ngano nga nakapangutana ka man Ben?” bawos-pangutana sa dalaga. Iyang giingnan si Zeny nga kun may boyfriend pa ang dalaga miuban na unta kini sa pagpangaligo. “Kausa pa ko makabaton og boyfriend Ben, kauban nako sa call center, pero nagbuwag na mi after Christmas,” matud ni Zeny. Ingon sa nahinangop si Ben. “Kun mao, libre diay ko nga manguyab nimo?”

“Ikaw ha? Palakero tingali ka no?” nakapangutana si Zeny. Milingo-lingo si Ben. Mipahiyom si Zeny. “Maligo usa ta, unya na ta magsultihanay ana.”  (Sumpayan)