Makigminyo ang minyo

Dear Tita Salie,

Have a wonderful day. I am Ms. Mei Khim, single, usa sa mga nagsunod sa imong column, Tita. Ganahan kaayo ko mobasa og Banat News ilabi na gyud sa imong mga tambag.

Ang akong problema mahitungod kini sa akong ex boyfriend, nga karon padayon nga misamok sa akong kinabuhi. Gusto man gud niya nga makigbalik nako bisan kun dili na ko gusto ug gikontrahan na usab siya sa akong mga kaliwat.

Kaslonon na man god unta mi, Tita Salie, last March unta ang among kasal apan wala kini madayon tungod kay ako mang nasayran o nadiskubrehan nga usa diay siya ka minyo. Giadto man gyod ko sa iyang asawa aron magpakiluoy nga akong bulagan ang iyang bana.

Naulaw gyod ko sa maong hitabo. Apan hangtod karon padayon kong gisamok niining  maong lalaki. Unsa may angay nakong buhaton aron moundang na siya, Tita Salie? Palihog pasabta ko. Thank you so much.

* * *

Good day,

Ayaw na tagda ang maong lalaki kay medyo baga siya og nawong. Tingali kun wala siya sa hustong panghunahuna. Kay ngano gong makigminyo siya nimo nga nasayod na man siya nga dili gyod mo puyde nga minyoon tungod kay duna na man siya’y gipanumpaan sa laing babaye.

Ug nganong natakda man ang inyong kasal nga usa sa mga requirements kun magminyo mao ang Certificate Of No Marriage or “CENOMAR”. Ayaw ko’g ingna nga nakakuha siya niini.

Sultihi ang iyang asawa niining padayon nga pagpakabuang sa iyang bana  diha nimo aron siya ang may katungod nga moreklamo. Ug puyde niyang kasohan ang iyang bana pinaagi sa imong panabang aron mahunong ang iyang kabuang. -- Tita Salie