Magalgal dayon
Dear Tita Salie,
Good morning. Ganahan kaayo ko mobasa sa Banat News labina niining imong pasabta ko column. Usa ko ka inahan apan dili asawa tungod kay puyopuyo ra mi ug dili kasado. Duna koy anak tulo kabuok.
Nagproblema ko niining akong kapuyo, Tita Salie, tungod sa iyang kinaiya. Magalgal man god dayon siya sa iyang mga amigo sa inom. Responsable man unta siya. Driver lang siya apan iya gyud nga i-intrigo ang tanan niyang kita diri kanako. Kamao gyud siya modala og pamilya.
Dili man unta siya moinom kun wala lay mogalgal niya. Busa ako siyang giingnan nga kun dili siya mag-usab ako siyang biyaan, apan gitubag lang ko niya nga lakaw lang.
Ug dihay usa ka beses nga mibiya gyud ko ug mipauli sa amoa. Apan wala man gihapon siya mausab, Tita Salie. Unsa may akong buhaton? Palihog pasabta ko. Daghang salamat sa pagtagad ning akong problema.
* * *
Good day,
Ingon gyud niini ang mga lalaki dali na kaayong magkasinabot mahitungod na sa inom. Sama sa mga babaye dali ra usab magkasinabot mahitungod sa mga girl things.
Dili maayo nga higpit kaayo ka sa imong bana kay tingali unya kun masakal siya ug kapuyan na unya siya kanimo. Kay matud pa nimo maayo siyang bana ug maayong modala og pamilya kay mointrigo gyud siya sa iyang kinitaan.
Hatagi pud siya og panahon nga makarelaks tungod kay dili sayon ang mangita og kuwarta labina ang mga driver. Busa human sa trabaho morelaks una og gamay.
Instead nga masuko ka, lambinga siya, ug ingna nga dili magpalabi ug dili kanunayon tungod kay ma-worried mo nga iyang pamilya kay tingali kun masakit siya. -- Tita Salie
- Latest