Dalagita nilayat sa pantalan missing pa
CEBU, Philippines - Wala gihapon nakit-i ang lawas sa 16-anyos nga babayeng tinun-an kinsa gituohang naghikog ug nilayat sa pantalan sa Barangay Poblacion, Lungsod sa Argao niadtong nakalabay nga hapon.
Ang desk officer sa Argao Police Station, Police Officer 2 Benjamin Gerosaga, nga nahinabi sa Banat News nagkanayon nga human naalarma ang kapolisan sa hitabo, dali dayon nila nga gipangita ang 16-anyos kauban ang mga rescuer apan pakyas.
Matud ni Gerosaga nga sa pagkakaron ang grupo sa municipal disaster team sa Argao mao na ang nagpadayon sa pagpangita sa lawas sa dalagita.
Daku ang pagduda ni Gerosaga nga lagmit gumikan sa sulog sa dagat naanod kini sa layo nga dapit dihang nilayat ug naunlod sa dagat.
Miyerkules sa hapon dihang nakit-an nga nilayat sa pantalan ang dalagita nga tinun-an sa Grade 10 sa Argao National High School.
Una nang nagduda ang kapolisan nga naghikog ang tinun-an gumikan sa suicide note sa iyang notebook diin kini nangayo og pasaylo sa iyang gihimo ug sumala pa nga personal nga problema ang hitabo.
Nagkanayon si Gerosaga nga ila na sab gialarma ang ubang lungsod sa pamasin nga madagsa sa silingan nga mga dapit ang lawas niini. (BANAT NEWS)
- Latest
