Mayor Durano nakakuha og TRO
CEBU, Philippines - Nakakuha og Temporary Restraining Order gikan sa Court of Appeals (CA) Special Seventeenth Division si Danao City Mayor Ramon “Nito” Durano III sa pagsuspenso kaniya sa Ombudsman og tulo ka buwan.
Ang resolusyon gipirmahan nilang Associate Justices Romeo Barza, Socorro Inting ug Maria Filomena Singh niadtong Abril 3, 2017 diin gihatagan si Durano og 60 ka adlaw nga TRO human usab siya makabutang og P100,000 nga bond.
Ang TRO nagdili sa Ombudsman ug Department of Interior and Local Government sa pagpatuman sa nahaunang desisyon sa Ombudsman niadtong Hunyo 22, 016.
Si Durano nagsugod sa pagsilbi sa iyang suspensiyon niadtong Marso 15, 2017.
Unang niduso og motion for reconsideration si Durano apan iya kining gibawi ug nisang-at og petisyon sa pagkwestiyon sa pagsuspenso kaniya ug nangayo og TRO.
Si Durano gireklamo nilang Orlando Dagatan, Jr., Amabella Gomez, Cecilia Lawas, Celso Aylwin Manulat, Leo Enriquez, Conchita Batuto, ug Maria Sofielyn Camance human sila gitangtang sa trabaho sa kagamhanan sa Dakbayan sa Danao.
Sila tinudlo panahon sa administrasyon ni kanhi mayor Ramon “Boy” Durano Jr. gikan sa 2010 hangtud 2013 apan gitangtang sa igsoon nga si Mayor Nito dihang siya nilingkod isip mayor niadtong Hulyo 1, 2013.
Si Mayor Nito nakapakita og ebidensiya nga gibalik na ang mga kawani niadtong Disyembre 2015 ug nalangan lang ang paghatag sa ilang sweldo hinungdan sa pagsang-at sa kaso. (BANAT NEWS)
- Latest
