Kapitan Lopez buot masayod kinsay mi-leak sa iyang ngan

CEBU, Philippines - Wala mabalaka si Mayor Tomas Osmeña subay sa hangyo ni Busay Barangay Captain Amilo Lopez ngadto sa Office of the Ombudsman nga mohimo og imbestigasyon aron masuta kun kinsa’y nag-leak sa iyang ngalan nga positibo sa drug test nga gihimo sa Cebu City Office for Substance Abuse Prevention (COSAP).

Kahinumduman nga niadtong Miyerkules sa miaging semana, nagpadala og suwat sa Ombudsman si Lopez kay buot niyang mahibaw-an kun si Mayor Osmeña o si Dr. Alice Utlang, ang pangulo sa COSAP maoy mipagawas sa iyang ngalan bisan og wala pay confimatory test.

Hinuon si Osmeña miingon nga anaa ra sa kapitan kun gusto niining paimbestigaran ang hitabo sanglit aduna man usab siya’y katungod nga mobuhat niini.

Namahayag kaniadto si Lopez nga iya kining gibuhat human mangunsulta sa iyang mga higala kay hangtud karon daku kaayo’g epekto kaniya ang hitabo ingon man sa iyang pamilya.

Subay niini ang mayor nagtuo nga aduna’y tawo nga nagpaluyo kang Lopez aron buhaton ang ingon.

Apan giklaro ni Kap Lopez nga wala’y tawo nga nagpaluyo kaniya ug kaugalingon niya kining desisyon sa pagsang-at og request ngadto sa Ombudsman kay gusto niyang mahibaw-an ang kamatuoran ug mahatagan og hustisya ang nahitabo. Dili usab siya mahimong mandaran kun unsay angayang buhaton.

 Dugang sa kapitan nga wala siya’y kaso nga gipasaka kay ang iyang gihimo mao ang pagpangayo og katin-awan sa hitabo.

“Ang ako ra man kinsa gyud ang nag-leak, moingon mo og ni-file og kaso wala man ko ni-file ang akong gi-file didto nag-request ko sa Ombudsman kung unsa gyuy tinuod”, pasabot ni Kapitan Lopez. (BANAT NEWS)