Takas sa Talisay karong Domingo

CEBU, Philippines - Saulugon sa Siyudad sa Talisay ang ika-72 ka tuig nga Takas sa Talisay o Talisay Landing karong Domingo.

Nagkalain-laing programa ang masaksihan sa katawhan ilabi na ngadto sa mga beteranong nigahin sa ilang panahon niadtong wala pa nila hingpit nakuha ang ilang kagawasan gikan sa mga langyaw nga nisakop sa nasud.

Si Konsehal Socrates Fernandez nidapit sa katawhan nga mosaksi sa ilang paghatag og respetar sa mga beterano.

Gani nagkalain-lain na nga kalihukan ang gihimo subay sa kasaulugan sama sa beach volleyball. Masaksihan sab sa katawhan ang re-enactment human sa mubo nga programa uban sa mga langyaw nga bisita.

Samtang si Edgar Mabunay, budget officer sa dakbayan, nibutyag nga P500 mil ang ilang giandam nga budget lakip na niini ang pagkaon sa mga bisita.

Tibuok adlaw hangtud sa gabii aduna’y kalingawan sa ilang landing marker sa Barangay Poblacion.

Sa niaging katuigan, pipila ka beterano ang nangreklamo tungod kay sila gipainitan ug wala’y saktong pag-atiman kanila nga unta sila man ang apil sa kasaulugan. Si Mabunay niingon nga ilang buhaton ang tanan aron maatiman ang mga beterano nga motambong.

Ang mga beterano nga nisalmot gikan pa sa laing probinsiya ug ubang mga lungsod. (BANAT NEWS)