Ex-NBA veteran import sa Blackwater

CEBU, Philippines - Ang kanhi veteran power forward sa NBA nga si Greg Smith mao ang mobida alang sa Blackwater Elite sa PBA Commissioner's Cup nga sugdan sa Marso 17.

Si Smith maisip nga usa sa mga lig-ong import karon tungod kay katapusan kini miduwa sa NBA niadto lang miaging tuig. Si Smith nagdugay sa NBA diin miserbisyo siya sa upat ka koponan nga naglakip sa Houston Rockets, Chicago Bulls, Oklahoma City Thunder ug Minnesota Timberwolves.

Si Smith kinsa mas taas og tuig sa Rockets mi-average og 6.0 points ug 4.6 rebounds. Katapusan siyang miduwa sa Timberwolves sa wala pa mahimong free-agent ug mihukom nga moduwa na lang isip import.

Ang 6-foot-10 nga si Smith mihimo sa iyang unang appearance isip import sa Turkish League diin didto siya nakit-an sa mga scouts sa Blackwater.

Sa pagkuha nila ni Smith, ang Blackwater ni team owner Dioceldo Sy, malaumon nga makahimo sila og laing dakung kalambuan sa ilang performance sa liga. "Hopefully, he'll be a perfect complement for the team," matud pa niya sa Spin.ph.

Ang Elite mihimo og maayong sugod sa ilang kampaniya sa All-Filipino Cup, apan nakabsan sila sa kusog ug pakyas sila sa pagkuha sa ikawalo ug katapusang luna sa playoffs. (LPM) (BANAT NEWS)