29 ka badlungong polis ilabay sa lagyong dapit
CEBU, Philippines - Adunay 29 ka polis nga gikan sa Central Visayas ang ibalhin pagdestino sa lainlaing dapit sa nasud, apil na sa probinsya sa Basilan, human kini girekomendar sa Police Regional Office-7 ngadto sa Campo Crame.
Si Police Regional Director Noli Taliño mikunpirmar nga 29 ka pangalan sa mga polis, nga dili mga opisyal, ang ilang girekomendar nga ibalhin human sila gipangayoan sa Campo Crame.
Matud ni Taliño nga ang maong mga polis adunay mga kaso, ug ang uban kanila, nakamaneho pagkumbinsir nga dili na mopadayon ang mga complainant sa ilang kaso mao nga wala sila mataktak sa serbisyo.
“Grave misconduct depende yan. May in line of duty ang pagkaroon ng kaso, may mga police din diyan…naayos ang complainant,” matud pa ni Taliño.
Wala na hinoon mihatag si Taliño og pangalan sa maong mga polis ug kun asa sila nadestino. Padayong gisusi karon sa PRO-7 ang mga polis dinhi sa rehiyon nga nag-atubang og kasong grave misconduct.
Sa kaulohan, una na nga gipahibalo nga moabot sa 200 ka polis ang ipangdestino sa nagkadaiyang dapit, ilabi na sa Basilan.
Si PNP spokesman Dionardo Carlos mipasabot nga ang pagdestino sa maong mga polis sa nagkadaiyang dapit sa nasud dili usa ka silot kanila, kun dili, isip kabahin sa nagpadayon nga programa sa kapolisan aron mas mahimo sila nga epektibo ug kapahimuslan ang ilang serbisyo. (BANAT NEWS)
- Latest
