Pinoy karatekas wagi ng 6 ginto sa Singapore
MANILA, Philippines – Humakot ang junior karatekas ng anim na ginto, dalawang pilak at isang tansong medalya sa 2016 International Karatedo Open Championship na ginanap sa Bedok Sports Complex sa Singapore.
Nanguna sa kampanya ng Pilipinas si John Christopher Tadique na kumana ng dalawang gintong medalya sa boys’ division ng torneong inorganisa ng Karatedo Union of Singapore.
Nag-ambag din ng gintong medalya sina Catherine Tadique sa girls’ kumite 9-19, Arianne Robin Elinon sa girls’ kumite 14-15, Lester Casis sa boys’ kumite junior +60 at Roleen Ballaran sa boys’ kumite junior -50.
Nakalikom din ng pilak sina Richelieu Felipe sa kumite 12-13 at Darren Tan sa junior kumite +60 habang may tanso naman si Elinon sa kata cadet ng event na nilahukan ng mahigit 100 karatekas mula sa iba’t ibang panig ng rehiyon kabilang na ang Sri Lanka, Thailand, Hong Kong, Indonesia, Bangladesh, India, Malaysia at host Singapore.
Kamakailan lamang ay humakot ang Pilipinas ng siyam na ginto, anim na pilak at siyam na tansong medalya upang tanghaling overall champion sa 36th Karatedo Gojukai Annual Championship na ginanap sa Home Team NS Balestier Multi-Purpose Hall sa Singapore.
Gumawa rin ng ingay ang junior karatekas sa Jakarta, Indonesia nang umani ito ng tatlong ginto, apat na pilak at walong tansong medalya sa 1st International Indonesian Open Karatedo Championship.
Magandang simula ito para sa mga bagitong karatekas bilang paghahanda sa posibleng pagsabak sa 2020 Olympic Games sa Tokyo.
- Latest
