Gun ban na usab!

Lisura ipatuman aning pagdili sa Commission on Elections (Comelec) nga did-an na ang mga politiko pag-hire og mga bodyguards kon walay pagtugot gikan sa committee.

Kinsa man go’y manakop sa mga polis nga mag-uban-uban sa mayor nga ila ra man gihapong kauban ang gitugyanan sa pagpanakop.

Husto baya usab ang lakang sa Comelec kay kon dili did-an ang pagdala-dala og armas, daghan mang mga tawo nga licensed firearm holders nga mga bata-bata og mga politiko nga posibleng manghasi sa mga kontra.

Apan pastilan mamilegro man god tawon ang kinabuhi sa mga tawo nga tarong kay dili na makadala og armas apan ang kapolisan dili hingpit nga makapatuman sa firearms ban.

Samtang ang mga tarong nga tawo motuman sa firearms ban nga gimando sa Comelec sugod Enero 10, apan ang mga kriminal motuman ba god?

Bisan si Mayor Tomas Osmeña wala makagusto niining gun ban nga gimando sa Comelec kay ang mga tarong nga tawo moaplay og “exemption” lisud kaayo maaprobahan ang iyang permit.

Apan samtang wala kami makagusto si mayor Osmeña niining gun ban nga gimando sa Comelec, wala kita’y mahimo og dasigon na lang nato ang kapolisan nga mopaspas sa kampanya.

* * *

Dili na kita mahibulong pa kon ang mga kandidato sa Kugi Uswag Sugbo (Kusug) makaangkon na usab og kapildehan kay samtang naglisud sila pagpangita’g kandidato, wala pa kuno sila’y “political strategy” hangtod karon.

Kana kon toohan nimo ang pamahayag ni Alvin Garcia, ang kandidato pagka mayor sa Kusug, dihang giinterview siya ni Freeman reporter Ely Bolonos kaniadtong Dominggo.

Paita, samtang ang mga kandidato sa Bando Osmeña Pundok-Kauswagan (BOPK) nakapahigayon na og daghang pulong-pulong sa lainlaing mga sitio, apan sila sa Kusug wala pa makaandam? Kataw-anan.

Tan-aw nako sa tanang kandidato sa Kusug, si magpapatigayon Jonathan Guardo ra ang nakapangandam sa iyang kombati batok ni mayor Osmeña pagka kongresista diha sa south district.

Mora’g matuman na usab tingali ang panagna ni Marcelo Arepal nga naila sa ngalang “Brother Eloy” diha sa barangay Guadalupe nga kuno mangharos na usab ang pagpanaug.

Timan-i nga daghan og panagna si Brother Eloy nga natinuod. Usa niini mao ang panagna niya kaniadto nga si Cerge M. Remonde mahimong dakung opisyal sa nasud.

Manager pa lang niadto si Remonde sa DYLA dihang gitagna ni Brother Eloy ang kaugmaon ni Cerge. Karon tan-awa, si Cerge Remonde nahimo na nga press secretary human sa iyang pagka hepe sa Presidential Management Staff.

* * *

Angay’ng molihok si City Treasurer Ofelia Oliva kay daghang mga gasoline station karon ang namaligya na og ilimnong makahubog panahon sa gabii. 

Usa niini mao ang Caltex gasoline station atbang sa Asilo dela Medalla Melagrosa sa eskena Gorordo ug Archbishop Reyes Avenue.

Nakurat ko pagkakita sa daghang nanag-inom og beer sa mga lamesa nga gibutang gawas sa ilang mini store kaniadtong miaging gabii.

Sigurado ko nga ang permit sa maong gasoline station mao ra ang pagpamaligya og oil products ug dili ang pagpamaligya ug pagpainom og beer sa mga customers.

Kaniadtong Nobyembre, si Konsehal Edgardo Labella mireklamo nga ang gasoline station diha sa Mabolo duol sa simbahan namaligya usab og beer panahon sa gabii, ambot og nahunong na ba.

* * *

Karong buntag, diskutihon sa 888 News Forum diha sa Marco Polo Plaza Hotel mao ang politika sa ika-upat nga distrito sa Sugbo kay ang gidapit nga opisyal aron ipa-interview sa media mao si Kongresista Benhur Salimbangon.

Init man god kaayo ang eleksyon sa Bogo karong Mayo 10 kay si kanhi mayor Celestino “Tining” Martinez III mipapili man nga makig-return bout ni Benhur.

Gikuyawan si Benhur nga ang mga sakop sa anti-crime volunteers sa Bogo nga gimugna ni Mayor Junnie Martinez, amahan ni Tining, maoy gamiton sa pagpanghasi sa mga botante aron mobotar pabor kanila.

Ako isip lumad nga taga Bogo nangindahay g’yod og usa ka limpyo ug malinawong eleksyon sa among dapit.