Lalaki gipatay sa nitambong og birthday

CEBU, Philippines - Nahimong masulob-on ang kasaulogan sa usa ka birthday party dihang usa ka lalaki nga niagi sa ilang balay, gidunggab patay sa usa sa mga bisita niini.

Ang maong krimen nahitabo pasado alas 7 sa miaging gabii sa Barangay Cahumayan sa Dakbayan sa Danao.

Giila ni PO3 Joel Illustrisimo sa Danao City Police Station ang biktima nga si Elmer Calipay  ug  ang suspek mao si Jayren Castillo, silingan sa namatay.

Matud ni PO3 Illustrisimo nga naglakaw ang biktima pauli ug niagi sa panimalay nga nagsaulog og birthday. Ang suspek nga mitambong sa maong kasaulogan, nakasigpat sa pag-agi niini ug daling nigawas ug gisugat og dunggab ang biktima sa kilid ug bukobuko.

Suway nga nisibat si Castillo apan nadakpan kini sa mga polis nga mitubag sa alarma.

Dali sab nga gidala sa iyang mga kabanay ang biktima sa Danao Provincial Hospital apan gideklarar kini sa mga doktor nga dead on arrival.

Basi sa imbestigasyon sa kapolisan, nasayran nga ang biktima ug ang suspek adunay karaang panagbangi nga maoy gituohang hinungdan sa pagpanunggab. (BANAT NEWS)