Kuyaw gyud kaayo

Tan-awa, bisan ang kadagkoan sa Catholic Bishops Conference of the Philippines (CBCP) nahadlok gyud sa sangpotan kon si Davao City Mayor Rodrigo Duterte modaog nga presidente sa nasud.

Wala tuod nila ilha si Duterte nga maoy subject sa pastoral letter nga gisabwag sa mga simbahan apan ang mga tawo nga utokan makasabot kaayo kon kinsa ang gipasabot niini.

Sa maong suwat, giawhag ang mga Katoliko nga likayan ang pagbotar sa tawo nga hilig moabuso sa katungod sa ubang katawhan. Kinsa pa man diay ang gipasabot?

Sa tanang kandidato pagka presidente, si Duterte ra ang nanghambog nga dili siya mahadlok mopatay ug gani daghan na siya og mga napatay. Kinsa ba ang dili kuyawan niana?

Aw, hinuon, ang mga "closed-minded" na nga supporters ni Duterte mahimong dili na makasabot kay sirado na man ang ilang huna-huna. Kinsa man gud ang wala mangandoy og kausaban, apan kinahanglan nga pinaagi sa tinarong.

Unsaon, daghan man kaayo ang napatuo ni Duterte nga masulbad niya ang problema sa pagpayuhot og illegal nga drugas sulod sa tulo ngadto sa unom ka buwan.

Wala sila masayod nga gilingla ra sila aron madasig sa pagbotar kaniya. Unya, kining mga supporters ni Duterte kusog kaayo nga mangaway sa mga dumadapig sa ilang kaatbang. Maayo ba gud na?

Panid-i ra gud ninyo ang nag-usab-usab nga pamahayag ni Digong diha sa media kabahin sa lainlaing isyu, apil na ang kabahin sa iyang deposito sa bangko. Ganahan mo og presidente nga hilig mamakak?

Tiaw mo, may minilyon man diay nga deposito sa bangko si Duterte nga wala niya itug-an diha sa iyang Statements of Assets, Liabilities and Networth (SALN).

Nganong wala man niya itug-an? Kon legal lang ang gigikanan sa maong salapi, nganong mahadlok man?

***

Misuliyaw sa kalipay ang mga mamumuo nga sakop sa Associated Labor Unions-Trade Union Congress of the Philippines diha nga nadungog nila ang pasalig ni Kongresista Martin Romualdez nga iyang paninguhaon nga ma-revoke ang balaod nga nagtugot og contractualization.

Sila nga mga sakop sa ALU-TUCP, pulos sila regular nga kawani sa lainlaing kompaniya, apan adunay daghan nila nga kabanay nga nagpabiling contractual diha sa tagsa-tagsa nila ka kompaniya nga gitrabahoan.

Kada lima ka buwan papirmahon ra sila og kontrata. Nagpasabot nga wala sila'y security of tenure. Matiguwang na lang sila, dili gayud sila mahimo nga regular, walay mga benefits nga madawat.

Si Romualdez gisuportahan sa TUCP tungod sa iyang pagbati ngadto sa mga mamumuo. Unya, ang ALU-TUCP misuporta usab diay sa kandidatura ni Tomas R. Osmeña sa pagka mayor ug ni Kongresista Raul del Mar sa north district dinhi sa dakbayan sa Sugbo.

Mga sakop sa ALU-TUCP nagbitbit og mga placards nga adunay hulagway nila ni Osmeña ug Del Mar atol sa ilang parade ug rally kaniadtong Domingo atol sa Labor Day.

***

Sa mga popularity survey, nagpakita nga pabiling nag-una si Duterte pagka presidente. Gisundan ni Grace Poe, Mar Roxas ug Jejomar Binay, dayon si Miriam Santiago.

Pagka bise presidente, kanunay nga nag-una si Bongbong Marcos, unya mag-ilogay kanunay sa ikaduha nga puwesto sila si Chiz Escudero ug Leni Robredo.

Usahay mabutang sa ikatulo si Robredo, apan usahay sab, mabiyaan si Chiz ni Leni. Ambot kon tinuod ba gyud kaha ang survey nga basehan nato sa sentimento sa kinabag-ang katawhan.

Kon magtan-aw ka sa mga rally ni Mar Roxas puwerte mang daghana nga tawo, sama ra usab kang Duterte nga maglawod usab ang mga manambong.

Ang tinuod, gusto na gyud ko nga moabot na ang adlaw sa election aron masuta na nato kon kinsa ang labing popular sa katawhan. Apan nindot gyud unta nga hinuktokan sa mga botante sa dili pa sila mosuwat sa balota, kon kinsa gyud ang labing maayo nga ibutang sa puwesto.

Kanunay man gud ko nga mangutana sa mga tawo kon kinsa ang ilang gusto nga mahimong presidente ug bise presidente. Klaro kaayo nga nadala lang sila sa propaganda diha sa social media ug sa mga tabi-tabi nga nindot kuno ang isog nga presidente.

Gusto ba kamo nga ang atong presidente daghan og kaaway nga mga lider sa ubang kanasuran ug kita maamong sa iyang kahambugero manulti?