Isda ug Imortal
May sukaranan ang pagkuwestiyon sa kamakiangayon sa mga lagda sa pagsuspenso sa klase ug trabaho kon may katalagman. Kon may bagyo, segun ning poster nga nikatap sa social media, ang giisip rang tawo mao ang mga tinun-an sa preschool, elementarya ug high school, samtang ang mga tinun-an sa kolehiyo giisip nga isda ug ang mga trabahante imortal.
Tungod ni sa lagda sa Malakanyang nga gipatuman sa Departamento sa Edukasyon nga kasagarang makalingkawas sa klase kon may public storm warning signals mao rang mga tinun-an sa high school paubos. Masuspenso lang ang klase sa kolehiyo kon Signal No. 3 na ang ideklarar sa Pagasa (Philippine Atmospheric, Geophysical and Astronomical Services Administration).
***
Bisan Signal No. 3, mga trabaho ra sa mga buhatan sa gobyerno ang gipasuspenso sa Malakanyang. Way hisgot bisan gamay na lang mag-unsa ang mga trabahante sa pribadong mga kompaniya. Wa ba diay silay apil sa pagpakabana sa gobyerno sa pagluwas sa mga molupyo gikan sa bagyo?
Labing makapanulisok nga gipakasama silang imortal atol sa mga katalagman mao ang mga trabahante sa call centers. Bisan atol sa makalilisang nga linog niadtong Oktubre 15 ug sa nisunod nga aftershocks ug bisan nagsingabot nang bagyong Yolanda niadtong Nobyembre 8, bisan gisuspenso na sa lokal nga mga opisyal ang trabaho, wa sila papaulia.
***
Kining karaang mga lagda nga nagdumili pagnunot sa panahon klarong gipasikad sa karaang tamdanan nga hinay pang uwan ug hangin ubos sa Signal No. 1 busa kindergarten ray papaulion, kusog nag diyutay sa Signal No. 2 busa wa nay klase hastang elementarya ug peligro nang Signal No. 3 busa hastang klase sa graduate school kanselado na.
Ipamugos ba gihapon nato ang mga lagda bisan nagkatuiris nang kahimtang sa panahon tungod sa global warming? Paabuton ba gihapon natong Signal No. 3 nga bisan sa low pressure area pa lang gani moawas na man ang atong mga kanal ug mga sapa?
***
Dako kaayo ang papel nga gihatag sa gobyerno ngadto sa pribadong sektor atol sa mga katalagman. Kasagaran di i-apil sa DepEd ni sa lokal nga mga opisyal sa pagsuspenso ang klase sa pribadong mga eskuylahan bisan naggusbat nang panahon. Samang hilom ang Malakanyang kanus-a suspensuhon ang trabaho sa pribadong mga kompaniya.
Si Labor Secretary Rosalinda Baldoz igo lang niawhag sa mga kompaniya paghatag og dugang insentibo sa mga trabahante nga motrabaho bisan atol sa katalagman. Hinaot nga di ni maoy hinungdan nga kaliboan ang namatay sa bagyong Yolanda ug dul-an sa gatos ang nakalas sa bagyong Glenda. Unsaon man nila pagpanalipod sa nasud ug sa katawhan atol sa katalagman kon di magkadimao bisan sa labing yano nga hisgutanan sa pagsuspenso sa klase ug sa trabaho?
- Latest
