Talisay mokuha’g consultant sa sewage treatment

CEBU, Philippines - Mokuha og consultant alang sa ilang Sewage Treatment Program (STP) ang kagamhanan sa Dakbayan sa Talisay inig mahuman na ang bag-ong merkado sa Barangay Tabunok karong tuiga.

Gipahibawo ni City Engineer Gamaliel Vicente Jr. nga ang ilang i-hire mao kadtong tawo nga suhito  sa sewage treatment kay siya  wala na makasinat sa bag-ong teknolohiya alang sa maong programa.

Matud ni Vicente nga dili mabalaka ang kagamhanan sa pagpangita og budget niini kay nakamenus man ang siyudad sa STP nga muabot sa P4 milyones tungod kay ang nidaug sa bidding sa paghimo sa STP sa merkado nipresyo raman og P11 milyones gawas sa ilang gigahin nga P15 milyones.

Subay niini, iya nang nasultian si Mayor Eduardo Gullas sa maong plano aron dili na kini mabalaka kun aduna man gani mga problema sa STP sa merkado.

Nasayran nga ang consultant nga ilang i-hire, motudlo sab sa ilang mga tawo sa pamaagi kun unsaon pag-atiman sa STP aron kun wala ang consultant, sayon na lang nila kining matrabaho.

Hinuon gipasabot ni Vicente nga magdepende na lang unya kini sa mayor kun idayon ang pagkuha og consultant. Sa nasayran, ang IM Bongar Inc. maoy motrabaho unya sa STP alang sa phase 3 sa merkado.

Ilang nasuta nga ang maong kompaniya, aduna’y katakus tungod sa ilang kasinatian ug mga nahaunang proyekto. - /DILT) (BANAT NEWS)