Rek Ceasefire sa CPP idadaan ni Duterte sa konsultasyon

MANILA, Philippines -  Hindi magdedeklara ng panibagong ceasefire si Pangulong Duterte sa Communist Party of the Philippines (CPP) hangga’t hindi nakokonsulta ang National Security Council lalo na ang militar at pulisya.

Balak ding konsultahin ng Pangulo si Senate President Koko Pimentel at maging si House Speaker Pantaleon Alvarez.

“I have to consult the Speaker, I have to consult the Senate President. I have to convene the National Security Council and I have to ask the generals of the army and the police kung ano ba... Kasi kapag ganon hindi naman sila sumusunod… eh magkakaroon lang ng aberration in the system of talking about peace…especially the military and police, I will call for a meeting and ask them,” pahayag ng Pangulo.

Pinangunahan ng Pangulo ang groundbreaking cere­mony ng isang drug abuse treatment at rehabilitation center sa Malaybalay City, Bukidnon.

Balak ng CPP na magdeklara ng unilateral ceasefire bago o simula sa March 31.

Nauna ng iginiit ng ilang senador na dapat magkaroon ng ceasefire lalo na sa Semana Santa upang magkaroon naman ng pagkakataon ang mga pulis at sundalo na makasama ang kanilang pamilya sa nasabing panahon na mahalaga sa mga Katoliko.

Inaasahang magkakaroon ng unilateral ceasefire bago magsimula ang panibagong peace talks sa pagitan ng gobyerno at ng National Democratic Front NDF sa Abril.