Kelot todas sa nakamaskara
MANILA, Philippines - Isang 25-anyos na lalaki ang binaril at napatay ng isang grupo ng kalalakihan na nakamaskara na sumalakay kahapon ng umaga sa Caloocan City.
Nasawi noon din ang biktimang si Jayson Mercado Reluban, tricycle driver at naninirahan sa Phase 7B Package 6 Brgy. 176 Bagong Silang, ng naturang lungsod.
Sa inisyal na ulat, dakong alas-5:30 ng umaga ay naglalakad mag-isa ang biktima sa eskinita sa may Phase 7B sa naturang barangay nang harangin ng apat na katao na nakamaskara at pagbabarilin sa ulo at katawan dahilan ng kanyang agad na pagkasawi.
Rumesponde naman ang mga tauhan ng Police Community Precint 3 sa lugar ng krimen ngunit bigo ang mga ito na mahabol at maaresto ang mga suspek.
Narekober sa lugar ng krimen ang tatlong cartridge ng bala ng kalibre .45 baril, isang live na bala, at isang slug.
Ayon sa purok leader sa lugar, kilala umano na sangkot sa pagbebenta ng iligal na droga ang biktima na kinukumpirma pa ng pulisya.
- Latest