Pacquiao-Khan saan ang laban?

MANILA, Philippines - Nakuha na ni Amir Khan ang laban na kanyang pinakaaasam at kumpiyansa siyang mananalo laban kay Manny Pacquiao.

“It’s a fight I know I can win,” wika ng 30-anyos na British boxer sa Snapchat.

 Ang laban nina Pacquiao at Khan ay inihayag kamakalawa at itinakda sa April 23.

Ngunit hindi pa napagdedesisyunan ang venue bagama’t sinabi ng ilang malapit kay Pacquiao na ang United Arab Emirates ang magiging lugar ng kanilang laban ni Khan.

Ang UAE ay nag-alok kay Pacquiao ng guaranteed purse na $38 million.

“Yes. It will be finalized next week,” wika ni Eric Pineda, ang business manager ni Pacquiao.

Hindi naman sigurado si Khan kung saan ito gagawin.

“There’s a couple of locations we’re looking at. One is (the) U.K. (United Kingdom), one is Dubai and one is in the USA,” sabi ni Khan.

Sa mga nakaraang taon ay ninais ni Khan na makasagupa si Pacquiao o si retired superstar Floyd Mayweather Jr., ngunit hindi ito nangyari.

Umakyat si Khan ng weight division at hinamon si middleweight champion Canelo Alvarez noong May.

Tinapos ni Alvarez ang nasabing laban sa sixth-round kung saan nakabulagta si Khan sa sahig.

Ngunit iginiit ni Khan na ang mahabang rounds na sparring niya sa Filipino senator sa ilalim ni trainer Freddie Roach ay nagbigay sa kanya ng sapat na eksperyensa para talunin si Pacquiao.

“I know a lot about Pacquiao,” sabi ni Khan.

Maliban kay Roach, sa dalawang boxers at kanilang mga handlers ay wala nang nakakaalam kung ano ang nangyari sa sparring ng dalawang welterweights.