3 Indonesian kinidnap sa Sulu
MANILA, Philippines - Sa kabila ng pinaigting na seguridad, tatlong Indonesian na naman ang iniulat na dinukot ng mga armadong kalalakihan na pinaghihinalaang mga bandidong Abu Sayyaf Group (ASG) malapit sa karagatan ng Sulu nitong Huwebes.
Kinilala ang mga binihag na biktima na sina Subandu Bin Sattu, Sudarling Samansung at Hamdan Bin Salim, base sa talaan na ibinigay ng Indonesian Police Attache.
Sa inisyal na ulat sa tanggapan ni Major General Carlito Galvez Jr., ang mga kinidnap na dayuhan ay kabilang sa anim na tripulante ng Sandakan –registered fishing vessel. Sinasabing inatake umano ng mga armadong grupo ang nasabing fishing vessel at tinangay ang tatlo sa mga tripulante nito.
Sa kasalukuyan, patuloy ang isinasagawang monitoring upang alamin kung saan dinala ng mga kidnappers ang mga bihag kasabay ng pag-alerto sa Joint Task Force Sulu upang imonitor ang posibleng pagdaong dito ng sasakyang pandagat ng mga kidnappers.
- Latest