Technician na estapador, itinumba

MANILA, Philippines – Malaki ang hinala ng mga otoridad na may kaugnayan sa trabaho ang pagpatay sa isang 42-anyos na pinagbabaril ng dalawang lalaki kahapon ng madaling araw sa Balut, Tondo, Maynila.

Ang biktima na namatay habang nilalapatan ng lunas sa Tondo Medical Center ay kinilalang si Victorino Dela Cruz, residente ng Aplaya St.,  Tondo, Maynila.

Batay sa ulat ng pulisya bago nangyari ang pamamaril sa biktima dakong alas-3:20 ng madaling araw sa eskinita ng Purok 6, Rodriguez, Balut, Tondo ay nakatambay ito nang lapitan ng dalawang suspek at malapitang pinagbabaril.

Lumalabas sa imbestigasyon, na maraming nagagalit na kli­yente sa biktima dahil hindi naman nito nagagawa nang maayos ang kanyang trabaho gayung laging humihingi ng bayad.

Ayon sa pulisya na estapador umano ang biktima na marami na umanong naloko sa kanilang lugar na hinihi­ngan ng pera, subalit hindi naman ginagawa ang trabaho.

Iniimbestigahan din kung may kaugnayan sa illegal drugs ang pagpatay sa biktima dahil isa itong drug user.