3 ka babayeng shoplifter sikop

CEBU, Philippines - Nasikop sa mga guwardiya sa mall ang tulo ka babaye nga naglakip sa usa ka menor de edad nga nanguha og siyam ka parisan sa mahalon nga tsinelas.

Ang mga dinakpan giila ni PO2 Jayson Flores sa Presinto 1 sa Mandaue City Police Office nga sila si Nena Lyn Caballero, Evelyn Sabequilla, ug kauban nila nga 15  anyos nga dalagita.

Asoy pa ni PO2 Flores nga ang mga guwardiya sa Pacific Mall nga nahimutang sa Brgy. Ibabao Estancia, ang unang nakamatikod kang Sabequilla nga misulod. Nasayran nga nadakpan na nila kini kaniadto nga nag-shoplift gihapon sa nahisgutang mall. Giingong miadto kini sa gipangladlad nga mga mahalong tsinelas, nagkuha kini og siyam ka paresan ug gipasa ngadto sa menor de edad nga kauban ug migawas dayon gitunol ngadto sa laing kauban nga nagpaabot sa may pultahan.

Dugang sa polis nga daling gidakop ang tulo ka suspetsado ug gitugyan sa ilang buhatan.

Sa ilang pakisusi, ang kantidad sa mga tsinelas nga ilang nakuha, mokabat sa P1, 917.75. (BANAT NEWS)