Mabulahan ang Cebu

Suwerte kaayo ang Pilipinas nga makakuha og balor $24 bilyones nga investment portfolio sa pagduaw ni Presidente Rodrigo Duterte sa nasud sa China ug Brunei Darussalam. Apan bisan pa niini, daghan gihapon sa mga Filipino, ilabi na kadtong mga ‘blind follower’ sa miaging administrasyon ni Noynoy, ang nagsige og saway nganong gihangop ang China ug gibiyaan ang Estados Unidos sa Amerika.

Sa ako na nga gikaingon, si Digong usa ka tactician. Gigamit niya ang China aron hatagan kita og tukmang tratamento sa US. Tukmang tratamento? Giunsa man diay kita sa US?

Daghan sa atong mga polisiya nga nag-agad sa US ug sa Europa. Daghan kitang gustong buhaton, apan nakahigot ang atong desisyon sa polisiya sa US ug Europa. Daghan untang industriya sa Asya nga gustong mobubo og puhonan sa Pilipinas, apan mabalibaran kay basin og mokompetensiya sa mga industriya sa mga Amerikano.

Tinuod, pinaagi sa US Aid, natabangan ang Pilipinas sa daghang mga proyekto. Apan pinaagi sa US Aid, daghan ang “prohibitions” sa atong ‘trade.’ Gikuyawan man gani ko nga pinaagi sa US Aid, nang-espiya ang Amerika dinhi sa Pilipinas.

Gawas pa, kun atong tan-awon, nagpasulabi man ang atong utang sa mga international organization sama sa World Bank. Nagbagood kita og pagbayad sa           interes.

Wala ko mahadlok sa dihang gianunsiyo ni Digong atubangan sa mga opisyal sa China nga iya nang giputol ang “iyang” relasyon sa Amerika. Tungod kay nasayod ko nga dili kini bastabasta nga mahimo.

Apan unsay nahitabo? Midalidali og anhi ang US Assistant Secretary of State for East-Asian and Pacific Affairs nga si Daniel Russel ug gipahibalo niya atol sa iyang pakigkita kang Foreign Affairs Secretary Perfecto Yasay Jr. nga ang US pabilin nga “steady ug trusted” nga alyado sa Pilipinas.

Usa unya sa mabulahan sa biyahe ni Digong sa China ang Cebu. Si Kalihim Mike Dino, ang presidential assistant for the Visayas, mitug-an nga nakigkita siya og mga 15 ka Chinese investors didto sa China aron mobubo og puhonan dinhi sa Cebu.

Ang mga Chinese investors nga nakigkita ni Dino didto sa China interesado mobubo og puhonan sa Light Rail Transit (LRT) system, waste-to-energy, socialized mass housing, ug integrated development masterplan alang sa Cebu.

Interesado kaayo ko nga masugdan na ang LRT. Grabe na ka-trapik sa Cebu nga nagkinahanglan na og mass transport system gikan sa sentro paingon sa amihan ug sa habagatan.

Ang LRT nga gisugyot ni Dino mahimong adto mag-agi sa ibabaw busa dili makabalda sa existing na nga karsada, ug adunay mga bahin nga adto kini mag-agi sa subway ilawom sa yuta busa dili makabalda sa kalihukan sa yuta.

Ang mga nagsupaksupak sa LRT adunay mga regresibo (atras) nga panghunahuna.