Kaso sa bangko: Tom andam dad-on sa Korte Suprema o sa Presidente

CEBU, Philippines - Wala maluya si Cebu City Mayor Tomas Osmeña sa pag-aprubar sa Regional Trial Court (RTC) Branch 18 nga Writ of Preliminary Injunction nga giduso sa Banco de Oro kay matud pa niya usa lang kini ka ‘setback.’

Ang maong injunction order nagmando sa kagamhanan sa siyudad sa Sugbo nga dili pasirad-an ang 28 ka branches sa BDO nga maoy gustong mahitabo sa mayor tungod sa isyu sa buhis nga gihimakak sa maong bangko. Sa official Facebook Page ni Osmeña matud niya di kini angay ikaluya kay sinugdanan pa lang kini sa iyahang mga buhaton.

Andam siya nga mag-abot sila sa BDO didto sa Supreme Court ug ni Presidente Rodrigo Duterte.

“I will escalate this when time comes. I will escalate this to the Supreme Court and the President if I have to. This will not end quickly. We have a long, winding, and bumpy road ahead. But we will get there,” tipik sa post ni Mayor Osmeña.

Kahinumduman ang mayor mipasaka og kaso batok sa BDO Magallanes-Plaridel Branch niadtong buwan sa Enero kay matud pa wala kini mobayad sa hustong buhis subay sa tax ordinance sa siyudad.

Kaso ni Guardo klaruhon

Bisan og dili na kaalyado sa Team Rama si Konsehal Jerry Guardo human mitapon sa Bando Osmeña Pundok Kauswagan(BOPK) buot gihapon ni Vice Mayor Edgardo Labella nga mangayo og katin-awan kalabot sa kaso niini nga maoy rason nasuspenso ang konsehal. Kahinum-duman nga guilty ang desisyon sa Office of the Ombudsman sa kasong simple neglect of duty ug gisilotan og tulo ka buwan nga suspension si Guardo. Ang maong kaso nahitabo dihang kapitan pa si Guardo sa Brgy. Sambag 1.

Ang desisyon sa Ombudsman pabayron og penalty si Guardo apan ang DILG miingon nga aktibo pa sa serbisyo ang konsehal mao nga mas haom ang suspensiyon.Tungod sa kalibog sa desisyon  si Labella mipadala og suwat sa Office of the Ombudsman mahitungod sa kaso kini aron pagpangayo og katin-awan. (BANAT NEWS)