Luke Genesis sud na’s semifinals sa CELBA Tournament

CEBU, Philippines - Nakuha sa Luke Genesis ang automatic semifinals berth human sa ilang kulbahinam nga kadaugan pinaagi sa overtime batok sa Lisen, 50-44 sa katapusan nilang duwa sa elimination round sa CELBA First Conference Basketball Tournament 2017 sa miaging gabii didto sa Canduman Housing gym, Mandaue City.

Gitapos sa Luke Genesis ni Telly Herbieto ang eliminasyon isip no. 2 uban ang 7-2 record, samtang ang Lisen ni Gilbert Lisen natagak sa no. 3 bitbit ang 6-3 nga baraha ug mopailawom pa sa quarterfinals round.

Anaa unta sa Lisen ang posisyon aron makawat ang daog dihang labaw lang og usa ka lugas ang Luke Genesis, 42-41 sa nahabiling 10 segundos, apan napakyas kay usa ra sa duha ka free throws ang napasud ni Jealvan Achumbre hinungdan sa overtime. Si Achumbre maoy nangulo sa Lisen uban ni Eman Pacquiao nga parehong miantog og 12 puntos.

Samtang naungot ang iskor sa Lisen, 42 sa overtime, gidatadatahan sab sa Luke Genesis ang ilang labaw pinaagi sa mga free throws nila. Diha na miirog ang iskor sa Lisen sa nahabiling 45 segundos ug niadtong higayona abante og kuwatro puntos ang Luke Genesis, 48-44.

Si Ramie Suson maoy topscorer sa Luke Genesis nga mikulit og 15 puntos.

Sa pasiunang duwa, ang   AC  Troopers  ubos sa team  leader  nilang  si    P/Insp. Dondon Coloscos nakatukhang na sab nga nakapahayag sa ilang paglaum nga makaangkon og luna sa quarterfinals.

Ang AC Troopers mitipi sa team Gastardo, 46-43 ubos sa paggiya nilang Rex Gonzaga ug Ramil Baclay nga mipabuto og 11 puntos matag usa.

Si Ronald Llanos mao sab ang nangu sa Gastardo  sa iyang 14 puntos.

Ang AC Troopers ug  Gastardo ni Ramon Gastardo parehong nagbitbit og 4-4 records ug kinahanglang modaog sila sa katapusan nilang duwa batok sa tagsa-tagsa nila ka kaatbang aron makasud sa quarterfinals.

Gipaluyohan sa Silogan Ni Gian, ang liga nga naorganisar pinaagi sa paningkamot ni interim president P/Insp. Dondon Coloscos ug vice president Tony Alcover, gipadagan ni commissioner Albert ‘Obeth’ Ramos sa abag nilang Willy Medillo, Lloyd Chavez ug Richard Limosnero.

Puntos matag usa

Unang duwa:

AC Troopers (46) – Gonzaga 11, Baclay 11, Englis 6, Saldua 6, Chavez 4, Buenavista 4, Ferolino 2, Suico 2.

GASTARDO (43) – Llanos 14, Gelbolingo 4, Lauron 4, Villaroza 4, Deocares 3, Landiza 3, Gastardo 3, Marabi 2, Navarro 2, Mahusay 2.

Ikaduhang duwa:

LUKE Genesis (50) – Suson 15, Padayogdog 8, Castillo 7, Arela 6, V. Herbieto 6, T. Herbieto 4, Oquias 2, Taghoy 2.

LISEN (44) – Achumbre 12, Pacquiao 12, Mendoza 4, Ygonia 4, Rosacena 4, Budiongan 3, Tigue 3, Ecot 2. (BANAT NEWS)