Hapones dedo sa aksidente sa Commonwealth
MANILA, Philippines - Isang Japanese national na hinihinalang nadisgrasya habang nagmamaneho ng kanyang motorsiklo ang nadiskubreng walang buhay habang nakahandusay sa kalye sa kahabaan ng Commonwealth Avenue Quezon City, kamakalawa ng gabi.
Ayon sa ulat ni SPO1 Marvin Masangkay, ng Quezon City Police District-Criminal Investigation and Detection Unit (QCPD-CIDU), nakilala ang biktima na si Toshiya Ishigaki, 44, administering manager ng IBM at residente sa North Flaire Tower, Boni Avenue, Mandaluyong City.
Sa imbestigasyon, natagpuan ang biktima sa may kahabaan ng Commonwealth Avenue, malapit sa kanto ng Villa Beatriz St., Brgy. Old Balara QC, dakong alas-11:30 ng gabi.
Sinasabing isang passerby ang nakapuna sa biktima habang nakahandusay sa nasabing lugar na walang malay at agad na ipinagbigay alam sa barangay.
Agad namang pinuntahan kung saan nadiskubre ang walang buhay na katawan ng biktima habang nakahilata sa kalye at duguan sa tabi ng isang Fino Yamaha motorcycle na walang plaka.
Lumalabas sa pagsusuri ng Scene of the Crime Operatives (SOCO) sa katawan ng biktima ay nagtamo ito ng sugat sa ulo at pagkabali sa kanang braso.
Nakolekta rin sa lugar ang nasabing motorsiklo, helmet, isang sling bag na may lamang Lenovo laptop at tablet, wallet na may lamang P170.00, personal na gamit at mga identification cards.
Sa kasalukyan, inaasikaso na ng CIDU ang mga dokumento upang ipabatid ang insidente sa Japanesse embassy habang ang bangkay ng biktima ay kasalukuyang nakalagak sa Light Funeral Homes para sa awtopsiya.
- Latest
