Basura dili lang problema sa gobiyerno
CEBU, Philippines - Istrikto na unya nga ipatuman sa kagamhanan sa dakbayan sa Talisay ang paglain-lain sa mga basura.
Gibutyag ni Talisay City Administrator Rudelyn Navarro nga ikaduha sa ilang listahan nga sulbaron mao ang mga basura sa dakbayan. Subay niini, ilang buhion ang Solid Waste Management Council nga maoy motutok sa maong suliran.
Ila sab hangpon ang balaudnon nga “No Segregation, No Collection” policy aron mas mapadali sa pagsulbad ang problema sa basura.
Dugang ni Navarro nga kun kinahanglan nga patas-an ang silot sa mga tawo nga dili motuman sa balaud, angayan kining himuon aron makita gyud ang resulta.
Ang dakbayan sa Talisay adunay 10 ka garbage trucks apan upat lang niini ang nagamit kay guba ang uban.
Gipahibawo ni Navarro nga nagproseso sila karon sa pagpalit og usa ka brand new nga garbage truck.
Nasayran nga gibato sa pagsaway ang lokal nga kagamhanan sa Talisay gumikan sa nagtipun-og nga mga basura sa nagkalain-laing dapit sa maong siyudad nga wala makolekta.
Si Navarro midugang nga edukaron sab nila ang katawhan kabahin sa basura kay ang maong problema dili lang sa gobiyerno, apil na ang katawhan sa pagdisiplina sa kaugalingon alang sa insaktong paglabay sa basura. (BANAT NEWS)
- Latest