Tapales modepensa batok sa kanhi K.O. victim

CEBU, Philippines - Si Marlon ‘Nightmare’ Tapales modepensa sa labing unang higayon sa iyang World Boxing Organization bantamweight title batok  ni Japanese challenger   Shohei Omori nga gipilde na niya kaniadto pinaagi sa knockout sa  usa ka dumot nga “rematch”  karong Abril 23 didto sa Kyoto o dili ba sa Osaka, Japan.

“Yes, final na ang away. Nadawat nako ang kontrata niadtong Martes sa gabii ug akong gipirmahan karon lamang buntag (Miyerkules),”  matud pa sa tinamod nga Sugbuanong promoter nga si Rex  ‘Wakee’ Salud, ang manedyer ni Tapales.

Ang 24-anyos nga si Tapales misakmit sa korona sa WBO human sa dalaygon  niyang daog batok ni two-time Thai world champion Pungluang Sor Singyu didto sa Ayutthaya, Thailand niadtong Hulyo 27 sa miaging tuig.

Si Tapales madasigon nga mibangon human matumba duha ka higayon sa ikalimang hugna dayon na ngadto sa pagpasurender ni Sor Singyu sa ika-11 nga hugna.

“Nadugay-dugay sab usa pa naselyado nato ang away kay gusto nako ihatag ang labing maayo alang ni Tapales. Daghan ta’g nadawat nga offer alang sa una niyang depensa. Dunay gikan sa England, dunay gikan sa Australia, apan ang Japan akong gipili kay sa kong tan-aw mao ni labing nindot sa akong boksidor,” dugang pa ni Salud.

Moasdang sa gubat si Tapales nga inilog gumikan kay yano ra man niyang gipatikangkang si Omori sa una nilang engkuwentro niadtong Disyembre 16, 2015 didto sa Shimazu Arena sa Kyoto, Japan.

Human gitumba si Omori tulo ka higayon sa unang hugna, si Tapales mipatugpa og makabungog nga tuong suntok nga hingpit nga nakapasukarap ni Omori sa oras nga 1:35 sa ikaduhang hugna.

Bisan tuod og wala makaaway sud sa unom na ka bulan, si Salud nagkanayon nga si Tapales anaa sa labing maayong kondisyon gumikan kay wala kini puas nga nag-training bisan niadtong holiday season.

Sa kasamtangan, si Tapales nagbansay-bansay uban sa wa’y pildeng si Rex Tso (20-0, 12KOs), ang labing unang pro boxer gikan sa Hong Kong sa gym ni Salud. Si Tapales mitabang og baid sa abilidad ni Tso alang sa umaabot niining away karong Marso 11 didto sa Hong Kong Convention and Exhibition Center.

“Si Tapales kondisyon kaayo nga puwede siyang moaway bisan kanus-a, puwede gani karong adlawa. Molarga siya sa Hong Kong sunod buwan aron adto mag-train sud sa duha ka semana ubos sa imbitasyon ni Tso,” dason pa ni Salud.

“Batok ni Omori, akong tambag ni Tapales nga dili gyud siya mokompiyansa. Iya man tuod gi-knockout si Omori sa una nilang away, apan iyang huna-hunaon nga lisud ang moaway sa teritoryo sa kontra.” (BANAT NEWS)