ALA boxer manulong na sa Gensan

CEBU, Philippines - Ang boksidor sa ALA Gym nga si Raul  ‘Vulcan’  Yu manulong na karong adlawa didto sa General Santos City aron atubangon ang labing daku nga away sa iyang karera.

 Si Yu (9-1-2, 8KOs) gikatakda nga makigharong ni Jade Bornea (6-0, 4KOs) sa Sanman-Amoy Gym alang sa bakanteng IBF Youth superflyweight title nga usa sa upat ka championship fights nga idalit sa “Laban Pinoy 3: Rise of Champions” karong Domingo didto sa Lagao Gym sa Gensan.

Lisud nga tahas ang sagubangon ni Yu gumikan kay gawas nga wa’y pilde ang iyang sangkaon, si Bornea mideklara sab sa iyang kaandam nga makigpinaksitay kaniya ibabaw sa ring.

Gawas ni Bornea, mosalida sab ang laing pambato sa Sanman Boxing Club nga sila si Eden Sonsona ug Ben Mananquil ug ingon man si Lolito ‘Thunderbolt’  Sonsona.

Si Eden ‘Sanman’ Sonsona (35-6-2, 12KOs) makigtakus ni Jovanny Rota (9-9, 6KOs) sa Butuan City alang sa WBF International super featherweight title, ang manghod ni Eden nga si Lolito moharong ni kanhi Philippine light flyweight champion Renren ‘Rainman’ Tesorio (15-9-3, 4KOs) sa Manila alang sa WBF Asia super flyweight title, samtang si Manangquil (12-1-2, 3KOs) makigbatok ni kanhi WBO Asia Pacific Youth bantamweight champion Glenn ‘The Rock’ Porras (29-5-0, 17KOs) sa North Cotabato alang sa WBF International bantamweight title. (BANAT NEWS)