Tagoon bayani sa ginatilan
CEBU, Philippines - Ang fastbreak lay-up ni Hanzel Tagoon sa nahabiling 11 segundos sa duwa maoy nag-aswat sa Ginatilan ngadto sa makapaisag balhibong kadaugan batok sa Boljoon, 72-71 sa 2017 Cebu Governor’s Cup Under-21 Inter-Cities and Municipalities Basketball Tournament niadtong Domingo sa gabii didto sa Boljoon municipal gym.
Nakompleto gyud ang pagkamabayanihon ni Tagoon nga maoy mikadlit sa katapusang singko puntos sa duwa nga maoy nakapahaw-as sa Ginatilan gikan sa bangis nga kapildihan.
Sa dihang sila si Kenjie Gumera ug Carlo Binagatan mipalabaw sa Boljoon og kuwatro puntos sa iskor nga 71-67, kalit lamang nga nausab ang huros sa hangin pabor sa Ginatilan.
Kini gumikan kay human si Tagoon milansang sa iyang jump-shot nga nakapasikit sa Ginatilan, 69-71, ang Boljoon gitawgan og technical foul. Yano kaayong mipasud si Tagoon sa iyang bonus throw aron pagsikit og maayo, 70-71 sa nahabilin nga 33 segundos.
Sa ilang posisyon, wala makahimo og maanindot nga opensiba ang Boljoon nga gisamotan pa human masipyat si John Michael Balingit sa duha niya ka free throws sa nahabilin nga 17 segundos.
Gipahimuslan sa Ginatilan ang kahigayonan pinaagi sa mainit nga mga kamot ni Tagoon nga wala sab mopakyas sa iyang mga kaubanan pinaagi sa paglansang sa game-winner.
Gumikan sa ilang daog, ang Ginatilan nakamugna og four-way tie sa South Division Bracket 2 uban sa Boljoon, Dalaguete ug Samboan sa managsama nilang 2-1 nga baraha.
Si Tagoon mitali og 35 puntos, samtang sila si Junrell Oracoy ug Roland Tagoon miamot og 12 puntos matag usa. Bugtong si John Vic Olores maoy naka-double digit sa Boljoon uban sa iyang 18 puntos.
Sa laing duwa, si Renly de Leon mipabuto og 33 puntos sa dihang gilabhan sa Alcoy ang Santander sa iskor nga 89-75.
Ang Alcoy nagtangag na karon og 2-2 record, samtang ang Santander misukarap sa ikatulo niining sagunson nga pilde. (BANAT NEWS)
- Latest