30 priso sa CPDRC dad-on na sa NBP
CEBU, Philippines - Laing 30 ka mga insular prisoners sa Cebu Provincial Detention and Rehabilitation Center (CPDRC) ang gikatakdang ibalhin sa New Bilibid Prison (NBP) sa Muntinlupa karong umaabot nga Abril 16, 2017.
Kini ang ika-3 nga hugna nga ipadala ngadto sa National Penitentiary gikan sa provincial jail karong tuiga, kasagaran kanila kaso sa drugas ug murder ang giatubang.
Matud ni Bobby Legaspi ang officer in charge sa CPDRC nga gawas sa mga prison guards nga maoy mo-assist sa mga priso mihangyo usab siya gikan sa Cebu Provincial Police Office (CPPO) nga mopadala usab og polis nga motabang sa pagbantay sa 30 ka priso nga ipadala sa NBP.
Sa sunod bulan laing lima usab ka mga priso ang ibalhin na usab sa Abuyog, Leyte.
Base sa Philippine Correction System ang insular prisoners mao kini ang mga priso nga nakombikto ug di moubos tulo ka tuig nga pagkapriso.
Sa laing bahin, subling gipahinumdoman ni 3rd district representative Gwendolyn Garcia nga kanhi gobernador sa Sugbo nga dili mahimong manghunaw ang gobernador sa mga nanghitabo sud sa CPDRC.
Si Garcia namahayag niini atol sa roundtable discussion sa The Freeman niadtong Huwebes.
Sa iyang privilege speech, miduso kini og resolusyon ngadto sa Kongreso nga nagsaway ug nanawagan paghimo og inquiry bahin sa matud pa abuso ngadto sa mga priso dihang sila gipahubo atol sa Greyhound Operation sa PDEA-7. Le Phyllis Antojado ug Brenda D. Batuto (BANAT NEWS)
- Latest
