Nanglili sa nagpakigol priso

CEBU, Philippines - Nagtingkagol sa bilanggoan ang usa ka lalaki human nasakpi nga nanglili sa iyang kaubang babaye nga natulog nga nagsul-ob og mubo kaayo nga short pants sa iyang kwarto sa Lopena Building sa Tabunok, Dakbayan sa Talisay niadtong nilabay nga kadlawon.

Ang biktima nga dili magpahingan nagpangedaron og 30-anyos, stay-in nga trabahante sa usa ka opisina sa maong edepisyo.

Ang suspek nga usa ka utility sa ilang trabahoan mao si Elden Sanchez, 29-anyos, ulitawo.

Si PO1 Marlon Añabeza ug PO1 Sydney Alisoso nga pulos sakop sa Special Weapon and Tactics (SWAT) ang dali nga niresponde sa nahisgutang lugar human ang biktima nitawag og pakitabang.

Si Añabeza nagkanayon nga kaduha na kini nga gibuhat sa suspek ang pagpanglili apan gipalabay lang sa biktima ang unang higayon tungod kay nangayo kini og pasaylo.

Sa ikaduhang higayon nasakpan na sab ang suspek ug didto niplastada sa hagdanan nga gamiton panahon nga adunay emerhensiya o sunog.

Natulog ang biktima samtang nagsiga ang suga ug siya nakamata tungod sa kasikas sa bintana hinungdan nga iyang gipawong ang suga ug gilili sab niya kun si kinsa ang naa dapit sa bintana.

Nitawag og pakitabang ang biktima sa mga polis ug sa ilang pagresponde didto gyud nila nakita ang suspek sa hagdanan ug dali nga nagpatulog-tulog.

“Mura’g kadaghan na gyud ning gibuhat sa suspek unya didto na pud naghimo sa pagduwa sa iyang huna-huna samtang nagduwa sab siya sa iyang buhi tungod sa mga lama nga among nakit-an,” asoy ni Añabeza. Gidala sa Talisay City Police Station ang suspek ug gibalhug sa bilanggoan.

Ang biktima nisaysay nga mag-agad lang siya sa iyang amo kun unsa ang buhaton nila batok sa suspek. (BANAT NEWS)