Hinanggaw sa Malakanyang

Naklaro na ang kainutil sa Malakanyang, human gipadala niini si DILG Secretary Ronaldo Puno kagahapon sa udto didto sa rest house ni convicted president Joseph Estrada alang sa pormal nga pagtanyag kaniya og pardon.

Si Puno nga nagsilbi sab niadtong miyembro sa gabinite ni Estrada giubanan ni Senador Jinggoy Estrada. Tumong sa maong panagtagbo mao ang paghisgot sa mga kondisyon alang sa tanyag nga pardon.

Gipangayo ni Erap ang absolute pardon, buot ipasabot nga kinahanglang way kondisyon nga himuon ang gobyerno aron iyang dawaton ang tanyag sa pagpasaylo sa iyang pagpangawat sa kwarta sa gobiyerno niadtong siya pay nagtungkawo sa Malakanyang.

Si Puno miingon nga ang absolute pardon posibling magpasabot nga di na lang bawion sa gobyerno ang usa ka bilyon ka pisos nga kantidad sa mga kabtangan nga natigom ni Estrada gikan sa iyang pagpangawkaw.

Sigun sa ako nang nabatbat sa miagi nakong lindog, wa gyuy basihanan ang tinguha sa Malakanyang pagpasaylo ni Estrada. Una, mao nga dili pa final ang decision sa Sandiganbayan.

Ikaduha, insulto ni sa judiciary ug sa katawhan nga nagbantay ug naghago aron masiguro nga mopatigbabaw ang hustisya dinhi sa atong nasud.

Ikatulo, maghatag ni og sanglitanan sa mosunod nga mga presidente ug sa uban pang mga opisyal sa nasud nga naghimo og kahiwian sa pagpadayon sa ilang gibuhat. Ug ika-upat, magdasig ni sa mga opisyal sa gobyerno sa pagpangawkaw.

* * *

Klarong ulog-ulog ang gihimo sa administrasyon ngadto sa kampo ni Estrada aron mokalma sab kini sa pagkwestiyon sa mga gidudahang anomalosong mga transaksiyon ni Arroyo.

Nabalaka ang presidente nga mosunod siya o ba kaha ang iyang bana sa dili madugay didto sa prisohan tungod sa kontrobersiya sa broadband network deal ug uban pang mga anomalosong  transaksiyon sa iyang pamunoan nga subject karon sa imbistigasyon sa Senado diin kontrolado sa kampo ni Estrada.

Aron makakuha og concession sa nagpadayong imbistigasyon sa Senado gidali dali sa administrasyon ni Arroyo ang pagtanyag og pardon ni Estrada bisan kun wa kini mangayo.

Dili ba kataw-anan nga ang usa ka konbiktado nga nagmagahi pag-angkon sa iyang salaud bisan pa gikonbikto na sa hukmanan tanyagan hinuon sa gobyerno nga i-pardon?

Tinuod gyud nga “onli in da pilipins” nga makakita ug makadungog ka’g ingon niini ka hanggaw nga mga lakang sa gobyerno.

* * *

[email protected]