Terminal sa Bogo ibalhin

CEBU, Philippines - Giugmad sa pribadong kompaniya ang bag-ong Bogo Central Transport Terminal aron kini mabalhin gikan sa Barangay Gairan ngadto na sa Cayang diin usa ka dakong mall ug hotel ang ilang tukuron.

Gibutyag ni Bogo City Mayor Carlo Jose Martinez nga ang Robinsons Land Corporation (RLC) maoy niugmad sa P80 milyones nga proyekto sugod niadtong Enero ug gikatakda nga mahuman na karong Hulyo nga walay gasto ang siyudad.

“Ang Robinsons gustong mo-gauge unsa ka dak-a ang mall nga itukod by starting a bus terminal para ma-measure nila ang traffic unsa ka daghan mangagi sa City of Bogo,” matud ni Martinez.

Matud ni Martinez nga ang RLC motugyan sa mahuman nga proyekto ngadto sa siyudad nga mao na ang modumala niini.

Gikasabutan nga ang RLC dili mobayad sa real property taxes sulod sa lima ka tuig samtang ang kagamhanan ang makaangkon sa kita sa terminal.

Gipasabot ni Martinez nga gagmay ang karsada padulong sa kasamtangang terminal maong nalipay sila nga ibalhin ang terminal. (BANAT NEWS)